□Suh Dasingh /苏大星

Gouj nyied ngoenz cib hauh

Ciet lauxsae guek raeuz

Daj laeb ciet geq daeuj

Haeuj ngeihcib gouj baez

Lauxsae guh son gvai

Hawj vunzlai rox laex

Miz daudwz guh daej

Lumj gofaex maj maengh

Vanzlij aeu son saw

Bouxlawz goj coengmingz

Dungxsaej rimmbingmbing

Saehnieb dingh hwngvuengh

Lij gej mbouj roxyiuj

Hagseng ndiu hwnj sang

Ciuhvunz byaij roen gvangq

Ndwn sang yawj ndaej gyae

Sinhoj youq lajmbanj

Lae lwedhanh bae rengz

Vih ok ndei hagseng

Gveng liux byongh ciuhvunz

Sae mbouj gouz baudap

Rap naek dawz gwnzmbaq

Vih gensez guekgya

Hawj “swva” daengz caeux

Lauxsae lumj diemj lab

Cingq hab rongh bouxwnq

Rongh swhgeij caemh mwn

Ndwn gyang vunz ronghsag

Vunz miz caiz lumj mboq

Docih boux vat mieng

Sae guhhong bingzciengz

Guh giengz saeh hungmbwk

Lauxsae geng bobaq

Ganq faex maj ndaej hung

Miz go’bek gocoengz

Saeu liengz hung ndaej maenh

Angqhoh ciet lauxsae

Daihgya caez ciengq go

Coenzcoenz danq guekcoj

Gizgiz goj hoenghhwd