□ Luz Yuzgangh/陆如刚

Gangj daengz Raemxdiuqdat Vangzgojsu, gyoengqvunz doeg gvaq saw haenx, mbouj miz byawz mbouj rox. Diuz raemxdiuqdat neix baengh de raemx lai、 caek sang okmingz lajbiengz. Gizhaenx ndaej louz gvaq yamqdin Ciz Yazgwz boux Mingzcauz lijhingzgyah neix, geij aen gingdaeuz raemxdiuqdat ndaw densi 《Sihyouzgi》, couh dwg youq gizde aeu ndaej. Bet nyied raemxfwn lai，dwg mwh ceiq ndei yawjngonz raemxdiuqdat, yienghneix, gou iu geij boux baengzyoux hai ci bae Gveicouh youz, bae yawjngonz Raemxdiuqdat Vangzgojsu.

Vangzgojsu diegde gvihaeuj Gveicouh Swngj Anhsun Si, dwg dieg Buyihcuz comzyouq ndeu. Gizde depgyawj Yinznanz caeuq Guengjsae, liz Gveiyangz Si miz 150 lai goengleix gyae. Ngoenzde lajbyonghngoenz 3 diemj lai cung, dou cix daengz diegde, daj gij ci baiz rim song mbiengj roen yawj ndaej rox, dieg Vangzgojsu gaenq miz haujlai bouxyouz gag hai ci daeuj gizneix youz lo.

Gveicouh Swngj soqlaiz hawj gou yaenqsiengq dwg yiengh deihmauh Gahswhdwz ciemq bae dieg dingzlai, mboujgvaq deihseiq dieg Vangzgojsu Cin haemq bingz haemq gvangq, diuz Dahbwzsuijhoz raemx sawyauyau, heux gvaq henz cin numqnot lae coh dieg gingjgih Vangzgojsu.

Dieg gingjgih Vangzgojsu saed- ceih dwg dieg ngamzlueg doekgumz ndeu, song mbiengj bya sang dat lingq. Ngamq byaij haeuj ndaw gingjgih bae, couh dingqnyi sing raemxdiuqdat yiengj “huhu”, lienz- daemh hai ci baenznanz, saedcaih miz di fwngz maz gen unq, hoeng, baez dingqnyi gij sing raemxdiuqdat neix, gou couh cingsaenz hwnjdaeuj. Gyoengq hekyouz haeujhaeuj okok, roenbya youh geb youh ngutngeux, dou cijndei menhmenh byaij, cibfaen siujsim.

Deihmauh Gahswhdwz geizheih ndeiyawj dangqmaz, gwnz bya ndoqndiundiu, nanz ndaej raen gofaex hung, hoeng, gumzlueg cix gofaex sanggywggywg, laepcupcup, miz mbangj gofaex lij cigciep dokmaj youq gwnz ndaekrin dem; daxbaenh youq rog lij dwg mbwn gvengq ndit haenq, seizneix haeuj ndaw ngamzlueg daeuj, roxnyinh mbwn bumz rumz liengz. Byaij dwk byaij dwk, sing raemxdiuqdat yied daeuj yied yiengj, mwh dou byaij daengz doekbyongh dieg haemq gvangq he, foedfwd yawjraen dieggyae yangq (benq) ‘baengzhau’ he raezrangrang venj roengz ngamzbya daeuj, mbouj yungh lai gangj, yangq ‘baengzhau’ neix couh dwg Raemxdiuqdat Vangzgojsu okmingz lo! Caezgya raen daengz raemxdiuqdat, byaij roen engq miz cingsaenz lo.

Heux bae vanq dauq, mbouj rox geijlai baez cix heux daengz lajrij, gizde fatyienh lad daizngonzraemx gaenq ndwn rim gyoengq hekyouz lo, doenghboux doq yawjngonz doq haenhcwgcwg mbouj dingz.

（caengz sat）