□ Hoz Saubangj sij Cinz Siengzcouh Liuz Gingliuj Cinz Siengzgen hoiz

Veiz Gozcingh naeuz: “Sou aeu ciuq saehsaed bae senhconz gij huq ndaw Laeuzhung sou, ndei cix gangj ndei, mbouj ndei cix gangj mbouj ndei. Miz di vunz mbouj nyienh cawx huq Guengjsae, cij aeu huq Sanghaij, gizsaed Sanghaij caemh miz huq mbouj ndei, Guengjsae caemh miz huq ndei.”

Miz vunz cabbak naeuz: “Miz boux ganbu bae Baekging cawx aen siengnaeng, dauqma le yawj, aende yienzlaiz dwg Vuzcouh Guengjsae guh.”

Veiz Gozcingh naeuz: “Dwg vei, doxgaiq Guengjsae hix miz gaiq ndei. Gij huq raeuz ngamq gag guh haenx, haidaeuz cizlieng aiq yaez di, hoeng aeu dingjrengz de, gyaezhoh de, bang de daezsang cizlieng, gvaqlaeng de cix rox bienq ndei. Youq aen fuengmienh neix, gunghsangh aeu doxbang, gaej doxdik. Daengzcog doxgaiq ngoenzyungh raeuz ndaej gag baengh bonjfaenh muenxcuk le, caemh ciuqyiengh aeu daj diegrog buenq huq, gij huq raeuz caemh aeu gai daengz swngjrog caeuq guekrog bae.”

Gvangh Yenz caeuq gij vunzgaemhong Laeuzhung cungj byaujsi, gvaqlaeng yaek lai buenq gij huq Guengjsae gag guh haenx, dingjrengz ginghgunghyez Guengjsae.

Veiz Gozcingh lij cienmonz cunz le boux vunzhong maenhndei honggaicawx guh hong youq Laeuzhung Bakhuq haenx Fu Canvaz.

Fu Canvaz dwg boux cujcangj cujsaeq doxgaiq ngoenzyungh laeuzhung ndeu, daengx cuj 13 vunz youq de dazyinx lajde, hong yied guh yied sijsaeq, yied guh yied ndei. Gyoengqde cingzndat fuzvu hawj vunzlai, ndaej daengz hekcawx haenhndei. Miz boux hekcawx ndeu geiq daeuj hot sei haenhndei ndeu: “Laeuzhung Bakhuq dujva maez, Cujsaeq Canvaz bouxboux haenh; Yietnaiq ngoenzde lij hwnjban, Haemh soengq gva lengj haeuj ranz dou.”

(caengz sat)