Lungzlinz Gak Cuz Swciyen youq guh baez hong fuzbinz haifat ndawde aeu gaijndei vanzging nem coicaenh fazcanj guh muzbyauh, aeu haenqrengz hawj saujsu minzcuz baenzfouq guh gij yinvu ceiq naek, gyoebcomz gak bumwnz nem sevei swhyenz, roengzrengz guh ndei fuzbinz canjyez, coicaenh nungzminz demsou.

Aen yienh neix baengh swhyenz maenhndei diegbya, fazcanj iengangq、gosangh nonsei、vagimngaenz、gyoij- sihgung、makhwzdauz、siengmuengx ciengx bya、 cwz、 yiengzbya’ndaem daengj nungzyez canjyez, cizgiz damqra aen mozsi“giyez daeuz+gihdi+hozcozse+nungzhoh”, bangcoengh ung ok buek giyez daeuz nem canjyez gihdi, cugmbaek guhbaenz cungj mozsi aeu canjyez bae fuzbinz haenx, couhdwg ranz he daiq lai ranz、mbanj he daiq lai mbanj、lai mbanj baenz gihdi、gihdi coicaenh giyez daeuz fazcanj. Seizneix, iengangq、gosangh nonsei、vagimngaenz、siengmuengx ciengx bya daengj canjyez gaenq baenz canjyez daeuz.

Daj bineix daeuj, daengx yienh caiq ndaem lwgmak daegsaek 2519 moux、iengangq 4.116 fanh moux、lai ndaem suensangh 1.0862 fanh moux、lai ndaem vagimngaenz 8955 moux, daengx yienh diegraemx ciengx bya miz 52727 moux, comz dieg guh siengmuengx ciengx bya menciz 12.5 bingzfanghmij, ciengx bya 1.876 fanh sieng. Bineix buenq bi gonq, daengx yienh nungzminz moix boux cienzhau souhaeuj 2264 maenz, doengzbeij demhwnj 10.6%.

(Dauz Dwzgvangh)