“Dujgaeq (duzgaeq), dujbwnz (duzhanq), dujmuj(duzmou)……”Geij ngoenz gonq, youq ndaw Lanjhih Yangh cwngfuj veiyisiz, gyoengq bouxcoz he cingq nyinhcaen riengz lauxsae hag sawloih nem vahcoenz. Doenghboux gunghvuyenz nem guen- mbanj dayozswngh ngamq daeuj haenx cingq hag “vahdoj” Lanjhih.

Gaenh bi daeuj, doenghboux diegwnq daeuj Dasinh dang gungh- vuyenz nem guenmbanj haenx cug ngoenz cug lai. Gyoengqde dingzlai mbouj rox gangj vah dangdieg, hix dingq mbouj rox, neix hawj gyoengqde guhhong mbouj bienh. Vih hawj gyoengqde caeuq vunzmbanj engq ndei doxgyau, aen yangh neix guh le vahdoj beizyin hozdung, cawjdaez heuhguh “lai ndei doxgyau, daezsang naengzlig guhhong”.

Vunz Huznanz siuj Dwng bi- gvaq dayoz bizyez le, doenggvaq gunghvuyenz gaujsi daeuj Lanjhih Yangh guhhong. Ndwencieng seiz- haenx, gingciengz roengz mbanj bae guh hong mbaet dwkraemx coq diegoij nem diegdeih bienqdoengh.“Siengj mbouj daengz mbouj rox vah dangdieg caen mbouj fuengbienh. Ndaw mbanj haujlai bouxcoz okbae dajgoeng lo, lij gyoengq bouxgeq youq, gyoengqde cungj gangj vah dangdieg, caeuq gyoengqde doxgyau gig hoj, guhhong caen mbouj ngaih lo.”

Cawzliux youq godangz hag sawloih nem vahcoenz ngaih haenx, gyoengq yozyenz bingzciengz lij caeuq bouxcaemhhong dangdieg hag, roengz mbanj guhhong, couh yungh vah dangdieg caeuq vunzmbanj doxgyau. Ciuq cam rox, saw beizyin youz aen yangh neix boux senhconz veijyenz giethab vah guhhong yungh haenx bien baenz, aeu Vahgun nem vah dangdieg doxciuq, sijok gij mingz、seizgan nem vahcoenz ngaih—gwnhaeux, duzma, gangjgoj……

Doenggvaq baez hozdung neix, hawj gyoengq gunghvuyenz nem guenmbanj dayozswngh coz haenx ndaej daezsang naengzlig guh hong lajmbanj, hawj gyoengqde youq lajmbanj gij dieg gvangqlangh neix engq ndei hag bonjsaeh ok goeng- rengz.

(Nungz Yicinh Cau Van’gyauj)