Ngoenzneix, gou cingq sij cozyez, fatyienh duzgyau iq he, gou bonjlaiz siengj nyaenj de dai, hoeng daxmeh naeuz:“Gaej nyaenj de dai, de rox gwn duznyungz.”

Raen daxmeh baenzneix gangj, gou yawj gij yiengh iqetet de, sim siengj:“Mwngz yungh gijmaz fuengfap gwn ndaej duzn- yungz ne?”Gou gig geizheih, couh louz de roengzdaeuj. Gou sijsaeq yawj de, mbouj yaep ndeu de couh san ndaej fan muengx he, lumj aen lauzleiz ranz yahdaiq, gou aeu nye faex iq he coeg gaiq muengx byoengq bae, duzgyau lumjbaenz gig siengsim, sikhaek raih daengz giz byoengq haenx, lumjbaenz naeuz:“Yungh gijmaz fuengfap fong de ndei ne?”Cijraen gij rieng de daz gij sei okdaeuj, baenz gien baenz gien baenq dwk, mbouj yaep ndeu, fan muengx youh san ndei lo.

Cingq youq seizneix, daegnuengx cabheiq gou dawz sauqbaet gvangxgvat fan muengx bae. Gou raen muengx mbouj miz lo, couh gvaiq daegnuengx naeuz:“Mboujmiz muengx lo, duzgyau gou baenzlawz gwn duznyungz!”Gou nyoengx daegnuengx ok dou bae, suj dou hwnjdaeuj. Gou nanzgvaq dwk naengh gwnz mbonq seiz, yawjraen caekhaex duzgyau baenz gien baenz gien mbouj dingz baenq dwk, gij sei daz bae riengz caekhaex, fan muengx youh iq youh ndei he youh venj youq dangqnaj gou. Baezneix gou ndaej caen da yawj de baenzlawz san muengx.

Duzgyau mbouj doeknaiq, muengx byoengq le caiq san. Cungj cingsaenz de hawj gou siengj hwnj swhgeij. Gou sij cih mbouj ndei, cingq lienh sij, hoeng mbouj lienh ndaej geij ngoenz couh mbwq lo, siengj ndojgik lo, daj neix hwnj gou itdingh aeu lienh sij ndei.

(Cuh Gij)