Gou miz fouq lwgda ndongqrikrik he, gou aeu de yawj seiq geiq, yawj fwjhau、yawj ndaundeiq、yawj diegnywj、yawj raemxdah……

Gou aeu lwgda gou yawj seizcin. Gou yawjraen go’nywj iq conh ok naj namh daeuj, con aen gyaeuj lingzsingj de okdaeuj yawj aenbiengz; gou yawjraen dujva mbehai fajnaj riunyumnyum de, loh ok gij yiengh ceiq gyaeundei swhgeij; gou yawjraen raemxrij laecancan, cienzboq hawj vunz cungj rox seizcin daeujdaengz lo……

Gou aeu lwgda gou yawj seizhah. Gou yawjraen go’nywj heuloeg heuloeg, youq ndaw varang ngauznged aen ndang unqnyieg de; gou yawjraen va- ngaeux rangfwtfwt, youq ndaw rungj mbawngaeux ndiu gvaq- daeuj; gou yawjraen raemxmboq yiengj dikdoek dikdoek, loh ok di simsaeh sim iq mbouj gamj gietdingh……

Gou aeu lwgda gou yawj seizcou. Gou yawjraen go’nywj bienq henjgim, hawj daihdeih daenj geubuh angjlwenq gyaeu- ndei he; gou yawjraen vagut menhmenh hai angj, hwet unqnemnem, yawjdaeuj gig miz feihdauh……

Gou aeu lwgda gou yawj seizdoeng. Gou yawjraen go’nywj goeb denz nanwtnwt, cingq ninz diemzsubsub; gou yawjraen doenghduz gutgungq aenndang, youq ndaw congh ninzdoeng; gou yawjraen vamoiz hai angj, saek hoengz lumj feiz gig yienhda……

Gou aeu lwgda gou yawj ndaundeiq. Gij ndaundeiq ronghmyanmyan haenx, dwg lwgda aenmbwn, youq gwnzmbwn yaepmyab yaepmyab, cingq yawj cien yiengh fanh saeh lajbiengz. Gij rongh ndaundeiq, dwg gij soijlienh gyanghaemh aenmbwn, ndongqrikrik, ciuqrongh henz- mbwn. Gij ndaundeiq rongh camx da haenx, dwg baujboiq gyanghaemh, gij ndongq de baez myab baez myab, dwg baujboiq riu lo……