Gou nyinhnaeuz gyaez bouxwnq aeu daj gyaez swhgeij guhhwnj, gou couh gig gyaez gou swhgeij. Mbouj dwg aenvih gij yiengh gou, mbouj dwg aenvih gij hagsib cingzcik gou…… Dauq dwg aenvih gou vuedbued、sienhsoh、haengjangq、iugouz cinbu cungj daidu neix.

Gou gyaez gou swhgeij, aenvih gou miz aensim rox yungz vunz he. Danghnaeuz bouxwnq mbouj siujsim daemj gou laemx, gou mbouj rox fatheiq, dauq dwg doiq boux daemj gou naeuz:“Cingj mwngz siujsim di, baezlaeng aeu haeujsim lo.” Gou maqmuengh caezgya cungj gaej naeuz vunz, aeu swhgeij gag yawj swhgeij yiengh lawz guh mbouj ndei.

Gou gyaez gou swhgeij, dwg aenvih gou gig gyaez hagsib. Gou yienznaeuz maij doengh, hoeng baez gou dingh roengzdaeuj, gijmaz vwndiz cungj nanz mbouj ndaej gou. Gou nyinhnaeuz guhcaemz seiz aeu guh gvaqyinx bae, hagsib seiz aeu ciensim roengzrengz, caemhcaiq nyinh- caen hag, mbouj naengz doeng naemj sae naemj.

Gou gyaez gou swhgeij, aenvih gou miz giz ndei, hix miz di giz mbouj ndei hawj swhgeij saetmuengh. Gij ndei gou miz haujlai, beijlumj: Gyaez doegsaw, dwg lwg maezsaw iq he; lij gyaez veh veh, gijmaz vunz gajdungh, gijmaz su’myauz, gijmaz raemx- faenj saekcaij, gou cungj naengz veh.

Gou gyaez gou swhgeij, aenvih gou miz dwzcangz. Gou rox veh veh, seizneix gou gaenq dwg caet gaep lo. Gij veh gou veh haenx, cungj gig ndeiyawj. Danghnaeuz hawj gou veh doxgaiq roxnaeuz veh funggingj, gou veh ndaej lumjlili, lauxsae hix naeuz gou veh ndaej ndei, heuh gou roengzrengz hagsib, ceng’aeu gaij gij mbouj ndei swhgeij bae. Gou aeu gaijbienq swhgeij. Gou aeu bienq gaenxguh, gaenx hag, aeu ndaej cinbu hung……

Gou itdingh aeu gaijbienq, hawj gou swhgeij engq gyaez swhgeij.(Suh Swng)