Ndaw sujgyaj haetromh he, daengngoenz saj nip ndit daih’it roengz gwnzdieg daeuj, go’nywj daenj geu buhnaedcaw ndongqrikrik daxheiz raemxcaw soengq hawj de haenx vaiqvued dwk diuqfoux……“Cici cetcet”, dwg byawz youq gwnz yangzdaiz ranz gou ciengqceuceu?

Gou lienzmuengz buet bae yawj, O! Laxlawz dwg doiq roeg he daeuj ranz gou. Songde bwnmok, gwnz hoz lij miz geij geu bwnhau.Youq gyae yawj,caen lumj hoij diuz lienhcaw he. Lwgda ndaemndat de lumj duhheu baenzneix hung’iq, bak hoengzfet soemset hawj songde yienj ndaej engq lingzlet.

Gyoengqde “cici cetcet”gangj dwk, lumjbaenz doxyaeng gijmaz. Gvaq le yaep ndeu, duz roeg he mbin okbae lo, gou siengj: De itdingh dwg okbae ra gwn lo.

Hoeng gou guj loek lo, caj de dauqma seiz, gou miz di mwnh: Duz de vihmaz gamz nyefaex ma ne? Cijraen song duz de aeu nyauj caeuq bak dawz nyefaex guh baenz aen rongz iq dwggyaez he.

Gou dawz gienh saeh neix naeuz hawj daxboh daxmeh dingq, gyoengqde gig angq, cungj gig angqcoux duzroeg daeuj ranz gou an’gya. Dou dawz aen deb iq he caeuq aen vanj iq he, ndawde cuengq di haeux caeuq raemx, caegcaeg cuengq gwnz yangzdaiz.

Ngoenz he, gou fatyienh roegmeh boemz youq ndaw rongz doengh hix mbouj doengh. Byaij gyawj baez yawj, O!Laxlawz mbouj rox seizlawz, roegmeh gaenq ok song aen gyaeq baujboiq lo, gou byaij gyawj de seiz, de singjgaeh dwk yawj gou, gou ganjgaenj byaij deuz. Ngoenz he, song ngoenz……Doeklaeng, roeglwg byoeng lo. Song du roeglwg ngamq byoengq byuk okdaeuj haenx da baenqlili yawj seiqhenz, lij “cicici” dwk heuh mbouj dingz, ranz gou sawqmwh gig nauhyied. Gvaqlaeng, roegmeh moix ngoenz cungj youq “ranz” gvanjgoq roeglwg, roegboh cix okbae ra doxgaiq gwn.

Ngoenz he, song ngoenz, aen singhgiz he, song aen singhgiz……Roeglwg ngoenz beij ngoenz maj hung, ciemhciemh maj fwed lo. Sawqmwh miz ngoenz ndeu, roegboh caeuq roegmeh cungj mbin byaij lo, caiq hix mbouj dauqma, cij ce song duz roeglwg. Gou mbouj mingzbeg dwk cam daxmeh:“Vih gijmaz gyoengqde baenz simdoeg, mbouj aeu lwg swhgeij lo?”Daxmeh naeuz:“Roeglwg gaenq majhung lo, roegboh caeuq roegmeh dwg siengj hawj gyoengqde hag rox gag ra gwn.” Gou ngeixvaegvaeg ngaekngaek gyaeuj.

Dwg ha, roegboh caeuq roegmeh vihliux hawj roeglwg rox gag ra gwn, haenqsim vut roeglwg mbouj guenj. Saekmwh, roeglwg majhung le cij rox bohmeh dwg vih gyoengqde ndei cix yienghneix guh, cij rox bohmeh cungj gyaez daegbied neix.

(Mauz Yingj)