Gvaq saedceij gizgiz miz yozvwn,soucomz、caebyo hix dwg yozvwn. De ndaej hawj dou lumj duzrwi nei, bae ndaw suenva ndaw swnghhoz dou cimhra、dazoemq gij dangz vandiemz swhgeij.

Gou gig maij soucomz rin.

Soucomz rin ndaej hawj gou roxnaj gij doxgaiq ndawbiengz gyaeundei、geizgvaiq、saenzmaed. Ndaw biengz lumj gag miz boux mohsuzswh he,dawz gij rin bienqbaenz gak cungj gak yiengh、yienghsiengq mbouj doengz. Moix gaiq rin cungj lumj deu muz gvaq, iqet ndongqrik, cinggiuj saeqnaeh, ndeiyawj dangqmaz.

Gou cuengq rin youq ndaw aen hab iq he, dou itheij dajhai yawjyawj ba: Gij neix ndawde, gaiq ceiq hung cij hung baenz fa bingz, gaiq ceiq iq iq lumj lwgfwngziq. Ndawneix mizmbangj rin lumj duzbya iq, mizmbangj lumj duzguk, mizmbangj lumj dujva, lai cungj lai yiengh.

Mboujguenj gou daengz gizlawz, yawjraen gij rin gyaeundei、 iqet、 daegbied haenx, cungj gip hwnjdaeuj, cuengq haeuj ndaw hab bae.

Sujgyaj、 hanzgyaj, gou bae ranz daxbuz caeuq gyoengq hujgeiq iq cimh rin. Dou benz hwnj bya bae, dangh gvaq rij, con gvaq ndoengfaex, hamj gvaq boengznywj. Gij sing angqriu dou gingdoengh gyoengq roeg ndaw ndoeng. Yienghneix, dou ciengzciengz mienx mbouj liux doxbeij yawj byawz ak, bae damqyiemj yawj byawz ceiq mbeihung.

Moix baez ra ndaej cungj rin he, gou cungj gig angq, gij rin haenx buenx gou majhung, hawj gou seiziq gig vaiqvued.

(Liuz Nazyih)