Dou ngoenz dem ngoenz majhung, ndawde moix boux cungj gag miz nyapnyuk, gou hix dwg yienghneix, hawj gou ceiq nyapnyuk dwg gienh saeh haenx.

Couh dwg 2009 nienz 2 nyied ngoenz he, youq gwnz loh ma ranz, gou caeuq godaih lumj bingzciengz nei byaij gwnz roen iq, sawqmwh miz daeg gauh- cunghswngh he diuq okdaeuj, cam dou miz mbouj miz cienz, gou mbouj vueng saekdi naeuz: “Mbouj miz.” Boux hagseng hung haenx mbouj saenq, heuh dou ging fwngz hwnj hawj de saeuj ndang, caeklaiq gwnz ndang gou mbouj miz cienz, baez neix boux de fwngz byouq lo. Ngoenz daihngeih banringz cuengqhag, gwnz ndang gou miz gij cienz cawx bouh lw haenx, youh byaij daengz diuz loh iq haenx, boux hagseng hung ngoenzlwenz youh daeuj hangz dou aeu cienz, baez neix gou youh hawj de fwngz byouq. Siengj rox gou baenzlawz guh lwi? Mwh de caengz saeuj ndang gou gou gaenq diem cienz hwnjdaeuj lo. Ciep roengzdaeuj geij ngoenz song boux dou ciengzciengz bungz boux hagseng hung haenx, de hwk dou naeuz mbouj cinj bauq hawj bohmeh caeuq lauxsae, mboujnex, de couh moeb dou. Gou siengj bauq hawj lauxsae caeuq bohmeh, hoeng danghnaeuz hawj de rox le, caen rox moeb dou, danghnaeuz mbouj bauq hawj lauxsae caeuq bohmeh, ngoenzngoenz yiengh- neix hix dwglau. Gienh saeh neix hawj gou gig nyapnyuk, ngamqndei geij ngoenz neix de mbouj daeuj, dwg aenvih gwnz ndang dou cungj mbouj daiq cienz, couhcinj miz cienz hix mbouj hawj de ra ndaej raen, de doeknaiq lo.

Gou lij dwg miz di nyapnyuk, geij ngoenz neix de mbouj daeuj lo, gvaqlaeng caiq daeuj dou baenzlawz guh ne? Gou miz aen banhfap he, mboujgvaq gou mbouj rox, aen banhfap neix miz mbouj miz yungh, couh dwg haep de. Mwngz ndaej bang gou siengj aen banhfap he lwi? (Buz Mizlinz)