Vihliux haeujlaeg doidoengh hong “gvensim lwgnyez louzsouj”, saedsaeh bang lwgnyez louzsouj gaijgez hagsib caeuq gwndaenj miz gunnanz, Cangzdangz Cunghsinh Siujyoz gaihcanj “lwgnyez gangj simmuengh” hozdung, fatdoengh gwnzbiengz boux miz simgyaez haenx daeuj gvensim gyoengq lwgnyez louzsouj. Gyoengq boux miz simgyaez haenx gaengawq simmuengh gyoengq lwgnyez cawx daehsaw、saw、vwnzgi soengq hawj gyoengq lwgnyez, sawj gyoengq lwgnyez louzsouj angq doegsaw, angq swnghhoz, gamjdaengz ndawsim raeujrub.

(Lij Cinghsiz)