Seizdoeng miz ngoenz ndeu, duz douq he caeuq duz muima ndeu dungx iek dingj mbouj ndaej lo, couh doxiu caez bae ndaw ndoeng ra gwn, hoeng aenvih ndaw ndoeng laepngau, baez mbouj siujsim, songde deng doek roengz aen gumz canghdwknyaen vat ndei haenx bae lo, ndei ndaej ndaw gumz mboujmiz cax raeh faex soem, mboujnex songde mbouj dai hix deng camx sieng lo. Ndaw gumz laepsub, gwnz bak gumz cij raen miz di rongh he. Songde feiq geijlai doegrengz hix bin mbouj ndaej hwnj gumz daeuj. Duzdouq rengznaiq lo, couh ienq dwk naeuz:“Baezneix dai dingh lo, cungj dwg gvaiq mwngz, mboujmiz mwngz gou hix mbouj doek roengz aen gumz neix daeuj……” Muima dingq le hix mbouj gamj guhsing.

Seizhaenx, naehau foenfoen doek daengz gwnz ndang songde daeuj. Duzdouq boemz youq daej gumz mboen naeuz:“Dai dingh lo, gij nae neix itdingh dwg yahvuengz gwnzmbwn baij daeuj daenz dai raeuz……” Muima cix mbouj baenzneix naemj, de gamjdaengz, gij nae neix dwg yahvuengz gwnzmbwn baij daeuj gouq swhgeij, de yaengx fwngz yiengq mehmbwn angq hemq ndei, duzdouq yawjraen baenzneix, caiq hix mbouj gangj gijmaz lo.

Muima mboujduenh okrengz, ndawsim doiq seiqgyaiq cungmuenx maqmuengh, de gamjdaengz mehmbwn dwg bouxvunz simsienh ndeu, de mbouj saenq mehmbwn rox daeuj ceihfad swhgeij. De okrengz saenq gij nae gwnz ndang bae, nae laj din yied rom yied lai, liz bak gumz yied daeuj yied gyawj, ginggvaq hwnz ndeu roengzrengz, daengzlaeng ndaej diuq hwnj bak gumz daeuj lo. Duzdouq ne cix deng nae daenz dai lo. Veq gyaeuj yawj doengzdoih doxbuenx daeuj, ndawsim muima cibfaen cwxcaih……(Yenz Dauh)