Gou dwg lwg Bouxcuengh, gou gig miz seizheiq, daj doeg yozcenzbanh couh ndaej hag Sawcuengh lo. Lauxsae ngamq son geij ngoenz, gou couh rox doeg rox sij mbangj Sawcuengh lo. Ma daengz ranz, gou yungh Sawcuengh sij cih “daxboh、daxmeh”. Daxmeh yawjraen le, roxnyinh gig geizheih, cam gou naeuz:“Dahniq, mwngz rox sij Yinghyij la? Baenz leixhaih?” “Aiya, meh, mboujdwg law, dwg Sawcuengh ne!” “O, Sawcuengh ha? Mwngz rox yungh daeuj sij cih daxboh daxmeh lwi?” Gou fwngz vix cihsaw ngamq sij haenx naeuz:“Cih neix couhdwg ‘daxboh’, cih neix couhdwg ‘daxmeh’.” Daxmeh yawj le, haengjheiq raixcaix, haenh naeuz:“Yo, dahniq gou caen gvai, mwngz yaek roengzrengz hag bw.”

Doeg daengz siujyoz le, gou couh rox yawj rox doeg 《Gvangjsih Minzcuz Bau》 lo, lij daj ndawde roxndaej haujlai cihsiz. Miz haemh ndeu, daxmeh faeg byaekmou, gou doeg Minzcuz Bau, dang gou doeg daengz “Haj Aen Fap Hawj Moulwg Vaiq Maj” seiz, de doq dingz roengzdaeuj, doiq gou naeuz:“Mwngz doeg menh di, gou caemh yaek dingq!” Gou baez gawq baez gawq doeg hawj daxmeh dingq. Daxmeh dingq sat le, ngaekngaek gyaeuj naeuz:“Caen ndei lo! Caen ndei lo! Ngoenzlwenz duz moumeh raeuz ngamq roengz 12 duz lwg, gou cingq ngvanh yaek baenzlawz ciengx cij maj ndaej vaiq ne. Mbat neix, 《Gvangjsih Minzcuz Bau》 ndaej bang gou lo!” Doeklaeng, Daxmeh ciuq gij fuengfap haenx ciengx moulwg, moulwg maj ndaej gig vaiq, duzduz hoengzfotfot, cangqcwtcwt. Mbouj geijlai nanz, couh ndaej gai lo, canh ndaej haujlai ngaenz .

Gou bingzseiz yawj 《Gvangjsih Minzcuz Bau》, raen gij faenzcieng Sawcuengh haujlai daeggo dahcej ndaej daeng youq gwnzde, fwngz gou humzyubyub, caemh sij bien faenzcieng ndeu fat hawj Gvangjsih Minzcuz Bau. Hei, ngeix mbouj daengz caen ndaej daeng lo. Gou dawz gaujfei ndenq hawj daxboh, naeuz:“Daxboh, neix dwg gij gaujfei gou, mwngz dawz bae dajlaeuj doxgo vei!”Daxboh angqvauvau naeuz:“Yo, dahniq ndaej ngaenz laeuj hawj daxboh lo, caen ak. Hoeng daxboh miz ngaenz laeuj, mwngz lijdwg dawz bae cawx saw ma yawj, yienghneix mwngz couh bienq ndaej engqgya gvai lo!”

Sawcuengh hawj gou daiqdaeuj fukheiq. Miz ngoenz ndeu, hekgviq guekrog daeuj hagdangz gou canhgvanh. Gyoengq doengzhag daenj gij buh gyaeu Bouxcuengh, eu gij fwen ndeidingq angqcoux gyoengqde. Fwen ngamq eu sat, couh miz bouxhek mehmbwk sangseuq gyaeundei ndeu, byaij gvaqdaeuj got dawz gou, youh cup naj gou, haenh naeuz: “Good! Good! Very good!” Doeklaeng gou cij rox de dwg boux vaigyauh bucangj guekrog——Gwzlujgizya.

Gou yaek docih Sawcuengh, dwg Sawcuengh son gou gvai!