Aen haggeiz neix, ban dou daeuj goeng laexsae moq he. De daenj buh seuqsak, miz di byom, daiq fouq nganxgingq he, yawj gij yiengh de gig sienhsoh youh gig roxsaw.

Dou gig gyaez goeng lauxsae ngamq daeuj moq neix, aenvih de gig ndeiriu mizyinx. Couh gangj de hwnj dangz daih’it ba,dangz goq neix dwg gag gaisau swhgeij. Lauxsae sien gaisau swhgeij, naeuz de singq Huz, mingz heuh guh Swfwn, eiqsei dwg naeuz baengh swhgeij haenqrengz fwndou. Gangj sat, de baez cienj vahdaeuz, cam daihgya:“Byawz naengz heuh mingzcoh gou mbat he?” Gyoengq doengzhag baez dingq, sawqmwh da daengxdwd bak ajloeng, caezgya cungj nyinhnaeuz cigciep heuh coh lauxsae mbouj rox laex, ndigah byawz hix mbouj gamj heuh. Baenz buenq ngoenz, cij miz boux doengzhag he ndwn hwnjdaeuj, miz di laudedded dwk naeuz:“Huz Swfen lauxsae.” De haemq gvai, gya “lauxsae” cong cih saw, dingq hwnjdaeuj hix miz laex. Hoeng mbouj siengj daengz lauxsae youh ok diuz nanzdaez he hawj dou:“Byawz naengz mbouj heuh lauxsae song cih neix, cij heuh mingzcoh gou ne?” Lauxsae baez gangj sat, ndaw ban dinghsoebsoeb. Doeklaeng, miz boux doengzhag manzgyaengq he saeqsing heuh:“Huz Swfen.” Mbouj siengj daengz lauxsae gingqyienz dap:“Daengz!” Gyoengq doengzhag riu dwk dungxgyonj bae. Baenzlawz yiengh, lauxsae gou gaeuq ndeiriu mizyinx ba?

Huz lauxsae hwnjdangz seiz gyaez dawz mbangj cihsiz he caeuq sawcuenh vujyaz lienz hwnjdaeuj gangj. Beijlumj, lauxsae naeuz:“Seizneix gou yaek cienz gij ‘mizgiz’ yawhsib hawj sou, sou naengz sien gangjgangj gij gingniemh swhgeij lwi?” Boux doengzhag he naeuz:“Doeg sug govwnz, lienh sug cihmoq.” Lauxsae hoizdap:“Wng, neix dwg gihbwnjgungh.” Lingh boux doengzhag he naeuz:“Daez gij vwndiz swhgeij mbouj rox haenx okdaeuj.”Lauxsae riu dwk naeuz:“Sou cungj son ‘cezcauh’ hawj daihgya lo.”Gyoengq doengzhag boux ciep boux gangj, doeklaeng, lauxsae gvinab: Gihbwnjgungh: Doeg sug govwnz, lienh sug cihmoq, veh ok swyenzdon; cezcauh: Daez gij deihfueng swhgeij mbouj rox haenx okdaeuj.

Ndeiriu mizyinx, neix dwg gij yaenq- siengq Huz lauxsae hwnj dangz daih’it hawj dou. Sou gyaez boux lauxsae yienghneix lwi?(Yaem Coh)