“Gou daengz mbanj Myauzcuz guhhong, couh yaek vih beixnuengx Myauzcuz lai banh di saehndei、saehsaed, hawj gyoengqde vaiqdi fouqmiz, gvaq ndaej ndei.”Geij ngoenz gonq, youq Yungzsuij Myauzcuz Swciyen Danenz Yangh Mbanjmyauz Gauhmaj gwnz roensuijniz yangh gaep ngamq guhndei haenx, daenj gyaepmbinj、haizgaijfanghaiz, boux suhgi daeuz 40 lai bi mbanj gungzhoj heuhguh Van Gvanghbingz yienghneix naeuz.

Bi’gvaq 3 nyied, Van Gvangh- bingz daj Liujcouh Si Minzveij roengzdaeuj Danenz Yangh Mbanj- gauhmaj guh boux suhgi daeuz mbanj gungzhoj, bi lai daeuj, de coengh beixnuengx Myauzcuz banh le haujlai saehsaed saehndei.

Coih roen hawj vunzlai fouqmiz. Youz de haenqrengz guh, bi’gvaq 6 nyied, diuz roensuijniz doeng yangh haigoeng, bineix 1 nyied guhsat, diuzneix roengzngaenz 780 fanh maenz, gvangq 4.5 mij, raez 11 goengleix; yangh neix hix moix ngoenz miz le song dangq banci bae yienhsingz le youh dauqma, neix hawj dieg neix engq gyawj yienhsingz lo.

Hwngfat canjyez hawj vunzlai demsou.“Van Suhgi daengz mbanj dou le, daiq gou bae Liujcouh、Liujcwngz gij gihdi ciengx mou ngonzyawj、hagsib, lij gujli gou youq ndaw mbanj gag gaj mou gai, demgya souhaeuj.”Ndaw mbanj bouxvunz heuhguh Dai Yangzgvangh baenzneix naeuz. Song bi gonq, Dai Yangzgvangh heij ciengx mou, danhseih ciengx geij duz ndwi, souhaeuj gig noix. Van Gvanghbingz rox le, couh daiq de bae Lijcouh Si cawx moulwg caeuq daengz gizdieg ciengx mou hag baenzlawz ciengx mou, caemhcaiq coengh de aeu ndaej 2 fanh maenz guh cienzgoek, hawj de haenqrengz ciengx mou. Dangqnaj, de moix bi ciengx mou 3 buek, moix buek miz 200 lai duz, moix ngoenz gaj duz mou he gai, bi souhaeuj 3 fanh lai maenz. Ndaej de daiq le, dangdieg miz 5 hoh nungzminz caemh riengzlaeng ciengx mounoh haemq lai.

Gaijndei yienghsiengq mbanj Myauzcuz. Vih sawj mbanj Myauzcuz seuqcingh gyaeundei, Van Gvangh- bingz youq Mbanjgauhmaj doihaeuj gaij yinxraemx、gaij diengzhaex、 gaij ranzdajcawj nem ndaem faex rum gunghcwngz, neix ndaej vunzlai gaenriengz. Dangqnaj, gaij diengzhaex 102 aen, gaij ranzdajcawj 800 lai aen, gaij giz yinxraemx 3 giz, bu suijniz coq hongh 4500 mij. Hopheux aen hozdung“lajmbanj seuqcingh, Guengjsae gyaeundei”, lingh gaijndei nem doenggvaq《Gij Gvidingh Gauhmaj Cunh》, mizyauq dwk gaij bae rab、luenh、ca daengj, sawj mbanj Myauzcuz yienghsiengq moq- samsam bae.

(Lungz Linzci)