Doengzdoih gou Lij Mingz, caeuq gou doengz mbanj, itcig dwg doengzban doengzhag, dou gamjcingz ndei raixcaix.

Lij Mingz ndang byombyet, naengnoh ndaemndat, doiq lwgda ronghsag mizsaenz, ranznden cungj heuh de guh “makndaemgim”. Lij Mingz byaij loh cungj gyaez diuqbwngbwng, vih neix de gag naeuz swhgeij dwg “duzmaet daihvuengz” ne, mwngz gangj de dwggyaez mbouj dwggyaez ne?

Lij Mingz mboujdanh diencaen dwggyaez, caemhcaiq gyaez bangcoh bouxwnq. Mboujlwnh bouxlawz miz gijmaz gunnanz, de cungj riuhoho bae bangcoh.

Geiq ndaej miz baez ndeu, ndaw ban miz boux lwgmbwk doengzhag heuh Linzlinz din in byaij mbouj ndaej loh, hwnj yinhyoz goq aeu bae den’gyausiz hwnj, Linzlinz bae mbouj ndaej, simgip dwk daej lo. Siengj mbouj daengz Lij Mingz raen le, mbouj gangj gijmaz couh aemq hwnj Linzlinz, de ndang byombyet lij dwg haeb heuj dwk, mbouj goq gyoengq doengzhag riunyaen, dawz Linzlinz aemq bae seiq laeuz den- gyausiz lo.

Lij Mingz guh saeh gig saeqsim. Ngoenzgonq hwnj goq dijyuz seiz, gou mbouj siujsim deng diuz dietsei veq laemx, gwnz gyaeuj lae lwed lo. Lij Mingz yawjraen le, gipmuengz daj ndaw daehbuh gaem ok neb canceij daeuj bang gou uet lwed, ciep dwk daj ndaw daehvaq mbon ok “canggojdez” daeuj bang gou nem giz in. Gou geizheih dwk cam:“Mwngz baenzlawz yienghneix saenz, dwg mbouj dwg rox gou ngoenzneix deng sieng, ndaw daeh couh cang gij doxgaiq neix gouq gip?” Byawz rox Lij Mingz cix naeuz:“Saenz gijmaz saenz, hwnj goq dijyuz mienx mbouj ndaej bungq bae bungq dauq rox souh sieng, daiq gij doxgaiq neix ndaej bwh gip yungh ma, caen dwg da yawj mbouj gyae!” Caen dahraix, miz bwh mbouj lau! Neix mbouj dwg ma, gou couh dwg boux daih’it ndaej yungh ha!

Dangyienz, gou caeuq Lij Mingz hix miz mbouj ndei gvaq, hoeng dou moix baez doxndei cungj dwg aenvih de simgvangq nyaenx gou. Lumj Lij Mingz boux doengzdoih yienghneix, caen dwg gyau cib boux hix mbouj suenq lai ha, mwngz gangj dwg mbouj dwg?

(指导老师:覃珍团)