Gou miz boux doengzdoih ndei ndeu, dou daengx ngoenz lumj ngaeuz riengz ndang mbouj faenliz. Doengz- doih gou faj naj nohnwdnwd, fouq lwgda hung ndongqliklik, baihlaj aen ndaeng gig ndeiyawj haenx dwg aen bakvad iqet ndeu. Sou rox de dwg bouxlawz lwi? De couh dwg Lij Siujcin.

Lij Siujcin dwg boux doengzhag gyaez bangcoh bouxwnq ndeu. Miz baez ndeu, lauxsae dawz suyoz daihhaj danhyenz lienhguh gaujgenj fat hawj dou, Lij Siujcin gauj ndaej 100 faen, hoeng, doengznaengh de Vangz Haij cij gauj ndaej 60 faen, Lij Siujcin yawj youq ndaw da, gip youq ndaw sim. “Dinglingling……” Lingz roengzdangz yiengj lo, gyoengq doengzhag lumj rongz rwi sanq ityiengh bongh ok gyausiz, daeuj- daengz cauhcangz guh’angq. Gou hix caj mbouj gib dwk buet bae ra Lij Siujcin. Hoeng, cij raen Lij Siujcin ndang nem gyawj Vangz Haij, ngeng aen gyaeuj cingq nyinhcaen dwk gangjgej gij loek gwnz gaujgenj hawj Vangz Haij ne! De yaep he youq gwnz bonj bouh sijsij vehveh, yaep he youq gwnz gaujgenj ceijceij diemjdiemj, yaep he gangj mbouj dingz……Gou mbouj naihfanz dwk bek mbaq Lij Siujcin:“Gaej gangj lo, hawj de bae cam lauxsae, raeuz bae guh’angq ba!” Lij Siujcin ngiengx gyaeuj yawj gou da ndeu, riunyumnyum naeuz:“Mwngz sien bae gonq ba, gou aeu bang Vangz Haij dawz gij daez loek neix loengh mingzbeg bae!” Gangj sat youh ngaem gyaeuj naihsim gangj hwnjdaeuj. Gou mbouj miz banhfap, cij ndaej ngauz- ngauz gyaeuj bae ra boux doengzhag wnq guh’angq lo.

Singlingz hwnjdangz yiengj lo, gou lienzmuengz buet ma gyausiz. Mbwn gig aeng, daengngoenz lumj aen giuzfeiz hung ityiengh dak gwnz dieg, gou saj ndaej hanh lae hanh roenx. Caiq yawjyawj Lij Siujcin, de lij bang Vangz Haij gangjgej nanzdaez, de hix dwg hanh lae hanh roenx, raemxhanh lumj naed duh ityiengh swnh najbyak de lae roengzdaeuj, hoeng, de dwg vih bang Vangz Haij cix lae hanh. Cingq youq seizneix, lauxsae yamq din byaij haeuj gyausiz lo, Lij Siujcin gipmuengz dawz gaujgenj cuengq laj daiz bae, daep dujrwz doiq Vangz Haij saeq sing naeuz:“Yaep ndeu roengzdangz le, gou caiq laebdaeb bang mwngz gangjgej. Mwngz hwnjdangz itdingh aeu haeujsim dingq, hagsib ceiq youqgaenj dwg gauq swhgeij roengzrengz.”

Youh roengzdangz lo, gyoengq doengzhag youh ceng gonq lau laeng dwk buet bae guh’angq, hoeng Lij Siujcin lij dwg lumj haxbaenh ityiengh naengh youq henz diegnaengh, haeujsim lili dwk bang Vangz Haij gangjgej nanzdaez. Faen cung ndeu, song faen cung…… Lij Siujcin dauqdaej guh sat “aen hong” lo, de byoq gaemz heiq raezrangrang ndeu, lumj ndaek rin ndaw sim doek roengz namh, gwnz naj loh ok riunyumj vuenluplup. Vangz Haij gamjdoengh dwk naeuz:“Docih Lij Siujcin!” Lij Siujcin riuriu naeuz: “Mbouj yungh hekeiq, gou dwg banhcangj, neix dwg gou wngqgai guh.” Gangj sat, de couh rag fwngz gou caeuq Vangz Haij itheij angqvauvau dwk bae rog guh’angq lo.

Neix couh dwg baengzyoux ndei gou, boux doengzhag gig gyaez bangcoh bouxwnq ndeu, gou ceiq gyaez de, sou hix gyaez de lwi?

（指导老师：覃珍团）