Gaenh bi daeuj, Hocouh Si Bingzgvei Gvanjlij Gih aeu seiq hangh cosih, haeuj mbanj gungzhoj saujsu minzcuz saedhengz fuzbinz gunghcwngz, hawj haujlai saujsu minzcuz ndaej duet“mauh gungzhoj”, byaij hwnj roen baenzfouq.

It dwg fuzbinz sien“bang daezsang suciz”. Aen gih neix gonqlaeng youq Sahdenz、Ngozdangz Cin hai siujyoz minzcuzbanh, bangcoengh saujsu minzcuz hagseng swnhleih guhsat yivu gyauyuz, mboujduenh daezsang saujsu minzcuz vwnzva suciz. Linghvaih, aen gih neix daihlig gyagiengz gak cungj saedyungh gisuz beizyin, mboujduenh daezsang saujsu minzcuz vwnzva suciz, demgiengz baenzfouq naengzlig.

Ngeih dwg sien guh roen. Gaenh bi daeuj, aen gih neix doenggvaq lai cungj fuengsik roengz 1200 lai fanh maenz coihguh 18 diuz 58 goengleix roen mbanj, 6689 boux ginzcung saujsu minzcuz souh’ik, hawj dieg Yauzcuz haidoeng le roen baenzfouq、roen vuenyungz.

Sam dwg aeu canjyez daiq- doengh ginghci. Gaenh bi daeuj, aen gih neix ciuq dieg anbaiz, gohyoz gveihva, daihlig saedhengz canjyez fuzbinz gunghcwngz. Bineix, aen gih neix gungh fat daigvanj diep leihsik fuzbinz daengz ranz haenx 101 fanh maenz, bangfuz 380 hoh nungzminz gungzhoj fazcanj ginghci laj faex.

Seiq dwg“minzsinh gunghcwngz”hawj vunz ndang raeuj. Daj 2008 nienz daeuj, aen gih neix gungh youq mbanj gungzhoj saujsu minzcuz gaij ranzhaz 130 aen, gaijgez 520 vunz ranzyouq nanzdaez; coihguh 23 giz vunz caeuq doihduz gwnraemx gunghcwngz, gaijgez 4973 vunz gwnraemx vwndiz; caiq guh 2000 lai aen daemzcaujgi, hawj yienghsiengq mbanj saujsu minzcuz bienq ndei bienq moq, gij swnghhoz ginzcung saujsu minzcuz haenx cizlieng ndaej daezsang.

(Vangz Ligenh)