Youq ndaw swnghhoz raeuz fatseng haujlai saeh, lumjnaeuz, gvaq ciet “roek it”, caeuq daxboh daxmeh bae lijyouz, hoeng gienh saeh hawj gou ceiq nanzlumz dwg baez gaujsi ndeu.

Bi’gvaq, ngeih nienzgaep geizgyang gaujsi seiz, gaujsi seizgan miz 90 faen cung. Hainduj gaujsi lo, gou gig nyinhcaen yawj daez、naemjngeix、dap daez, seizgan ngamq gvaq ndaej diemj cung ndeu, gou couh sij sat lo. Hoeng gou mbouj lumj bouxwnq yienghhaenx sikhaek dawz gaujgenj gyau hwnjbae, cixdwg sijsaeq genjcaz. Gou ngeix gou itdingh dwg gauj ndaej 100 faen lo, gvaq geij ngoenz, lauxsae dawz gaujgenj fat roengzdaeuj seiz, gou caen dwg gauj ndaej 100 faen. Cuengqhag le, gou angqvau dwk dawz gaujgenj baema hawj bohmeh yawj, daxmeh naeuz:“Dahlwg gou baezneix gauj ndaej caen ndei ha, baezlaeng caiq nyinhcaen gauj, itdingh hix gauj ndaej ndei.” “Dahlwg gou caen ak ha !” Daxboh hix riunyumj dwk rub aen gyaeuj gou gangj. “Gou itdingh roengzrengz.” Gou gangj,“gou aeu hag gij cihsiz moq engq lai、engq ndei.”

Banhaemh, gou loq fangzhwnz, gou yawjraen gou youh gauj ndaej 100 faen lo. Gienh saeh neix caen hawj gou nanzlumz.(指导老师：李专红)