Baez gwn sae’gva, gou couh siengj hwnj gienh saeh fatseng youq it nienzgaep ndeu.

Miz baez ndeu cuengqhag dauq- ma, gou caeuq Lij Lingz﹑Yij Vei itheij sij cozyez. Gwj sij gwj sij, Lij Lingz cam:“Sou siengj gwn sae’gva lwi?” Yij Vei lienzmuengz naeuz:“Siengj, lienz loq fangzhwnz hix siengj gwn bw! Hoeng, neix baenzlawz miz ya!” Lij Lingz saeqsing naeuz:“Ndaw suen ranz mehbaj gou ndaem miz, raeuz itheij bae aeu gwn. ” Gou lienzmuengz naeuz:“Guhcaeg deng rox mbouj ndei ba?” Lij Lingz naeuz:“Raeuz byawz hix mbouj lwnh okbae, duzfangz hix mbouj rox ha.” Gou naeuz:“Dwg ha! Hoeng, danghnaeuz deng mehbaj mwngz fatyienh, mbouj deng moeb cij gvaiq ne!” Lij Lingz naeuz:“Mbouj lau, mehbaj daengx ranz vunz cungj bae gyae ndaem naz lo. ”

Caen dahraix, ranz mehbaj Lij Lingz gven dou caemrwgrwg. Yiengh- neix, dou benz gvaq ciengzdaemq, diuq daengz ndaw suen. Vasai, cungj dwg sae’gva hung, cingq ninz youq gwnz namh caengz ndiu ne! Dou genj aen hung mbaet. Dou umj sam aen sae’gva, lienz ruenz daiq ringx, gig mbouj yungzheih benz ok ciengz- daemq, buet coh laengmbanj. Dou sim diuqboebboeb dwk bag hai sae’gva, yienznaeuz sae’gva youh hoengz youh sa, hoeng gou cix gwn mbouj ndaej ok feihdauh daeuj.

Ngoenz daihngeih cuengqhag dauqma, gou yawjraen gwnz daiz miz haujlai limq sae’gva, noh gva youh hoengz youh sa, gou gipmuengz cam:“Gij sae’gva neix daj gizlawz aeu daeuj?” Daxmeh naeuz:“Dwg cawx dauqma, mwngz mbouj dwg gig gyaez gwn ma, dwg cawx hawj mwngz, gwn ba!” Gou dingq le, vax limq hung ndeu couh gwn hwnjdaeuj. Daxmeh cam:“Van lwi?”Gou naeuz:“Neix youh mbouj dwg caeg daeuj, baenzlawz mbouj van ne?”Daxmeh naeuz:“Neix couh deng lo, lwgnyez wnggai bae caeg doxgaiq bouxwnq ma? Daj iq couh caeg doxgaiq, daengz hung mbouj baenz vunzvaih ma?”Gou dingq le, roxnyinh aen“anq”deng daxmeh buq lo. Aeya, gou caen huk, baenzlawz dawz saehsaed gangj okdaeuj ne?

Gou caen boiqfug daxmeh buq anq leixhaih! Gou laihnaeuz daxmeh itdingh fwd gou donq ndeu, hoeng daxmeh cij dwg unqswnh doiq gou naeuz:“Sae’gva dwg bouxwnq sinsin hojhoj ndaem, cijaeu mwngz swhgeij gaenx guhhong, hix ndaej sou lwgmak. ” Gou dingq gij vah daxmeh, couh lumj byawz fak goenq dujrwz ndeu ityiengh, dujrwz goenjhuhu, raemxda doekbyoegbyoeg.

Daxmeh heuh gou bae nyinh loek, gou umj aen sae’gva hung ndeu siengqyaek siengqyawj dwk byaij daengz ranz mehbaj Lij Lingz, dingjlingz mehbaj Lij Lingz byaij okdaeuj, de raen gou yienghneix, sien dwg ngwngx yaep ndeu, ciepdwk riuhaha hwnjdaeuj. Gou najmong naeuz:“Mehbaj, ngoenzlwenz gou caeuq Lij Lingz, lij miz Yij Vei sam boux moix boux caeg aen sae’gva hung duhmwngz, gou loek lo. Daxmeh cawx aen sae’gva ma, gou dawz daeuj boiz hawj mwngz. ” Mehbaj Lij Lingz yiengq rog doidoi aen sae’gva, naeuz:“Lwgnyez ma, rox loek couh ndei, aen sae’gva neix mwngz couh umj bae ma gwn ba, gou ndaw suen lij miz ne!” Gou naeuz:“Neix baenzlawz ndaej, daxmeh itdingh ndaq gou. ” Gangj sat, gou cuengq aen sae’gva couh buet. Hoeng, baez neix buet, ndaw sim gou di he hix mbouj vueng.

Gienh saeh neix gvaqlaeng, gou caiq hix mbouj caeg doxgaiq bouxwnq gvaq lo, aenvih gienh saeh neix itcig son gou majhung.

（指导老师：覃珍团）