Gou miz doiq biujgo songseng ndeu, gyoengqde cij beij gou hung haj ndwen. Biujgo hung heuh guh Veiz Gaihdai, biujgo iq heuh guh Veiz Gaihgi. Seizneix gou yaek lwnh hawj daihgya dwg biujgo iq gou, de caen dwg boux “sawmaez iq” ha.

Miz baez ndeu, goengnax hung daiq song boux biujgo youq ndaw gyanghongh youzlangh. Gwj byaij gwj byaij, goengnax hung nyeux gyaeuj baez yawj, fatyienh biujgo iq mbouj raen lo. Neix hwk dwk goengnax hung lau liux, lienzmuengz caeuq biujgo hung bae ra, youq ndaw gyanghongh ra geij hop lienz ngaeuz cungj mbouj raen. Sawqmwh, goengnax hung lumjbaenz siengj hwnj gijmaz, de lumj mbin ityiengh buet baema ranz, hai dou baez yawj, soeng gaemz heiq ndeu, ndei lai lo, “lwgfangz iq”cingq naengh youq henz daizsaw maezmwdmwd dwk yawj saw ne！

Biujgo iq ceiq gyaez yawj bonjsaw gangj gij daswyenz haenx, rox gij cihsiz caen mbouj noix. Geiq ndaej miz baez ndeu, gou caeuq biujgo hung lwnzlawh ok daez daeuj duenz de, hix nanz mbouj ndaej de. Doengzhag ban de cungj haenh de guh “bouxbozsw iq swyenz”.

Bonjsaw ndaej hawj raeuz haujlai cihsiz, gou baezlaeng hix aeu lailai yawj saw.（ 指导老师：韦彩芳）