Gaenh bi daeuj, Duh’anh Yauz- cuz Swciyen dawz bae rog guhhong dangguh aen canjyez daeuz hawj nungzminz demsou haenx daeuj gaemmaenh, gyagiengz cugmbaek hengz bae rog guhhong, byaij ok diuz roen“cwngfuj dazyinx、yawj hawciengz bae guh、lai fuengmienh camgya、nungzminz souh’ik”bae rog guhhong haenx. Moix bi miz 16 fanh vunzbaez bae rog guhhong, moix bi caux ndaej ginghci souhaeuj gyawj 20 ik maenz, ok rog guhhong souhaeuj gaenq baenz cungj canjyez hung hawj nungzminz demsou he.

Vih daezsang bae rog guhhong cizlieng, aen yienh neix cizgiz saedhengz cosih, gyalai ginzcung ciuyez beijlaeh. It dwg gyagiengz beizyin. Aen yienh neix gyadaih ligdoh, gonqlaeng hai haici、dennauj、dienhhanh、hongranz、faexcuk gogaeu dajsan daengj 10 lai cungj hong beizyin, moix bi beizyin vunzhong 5000 lai vunz. Ngeih dwg riengzlaeng fuzvu. Gaenh bi daeuj, aen yienh neix gonqlaeng vih nungzminzgungh daezhawj faplwd camdap fuzvu 5 fanh lai vunzbaez, cekgej gij saeh doxceng 156 gienh, fat veizgenzgaj 18000 lai mbaw. Sam dwg gya’gvangq roen ciuyez. Vih gaijgez nungzminzgungh ra hong hoj vwndiz, yenveij、 yen cwngfuj cizgiz okbae lienzhaeh giyez, gonqlaeng caeuq Fangzcwngzgangj Gangjvu Cizdonz、Gvangjdungh、Fuzgen、Haijnanz daengj dieg doxyaeng dabbaenz lauzvu hezyi.

(Lanz Bizcwng)