Mbwn ndat vunz haengj daenj haizliengz, doiq boux baenz binghnyouhdangz daeuj gangj, youqgaenj seiz gojnwngz rox deng daet gen roxnaeuz daet ga, sengmingh miz yungyiemj.

It、Haizliengz aeu hab din. Couhcinj dwg mbwn ndat, ceiq ndei gaej daenj gij haizliengz loh lwgdin、loh giujdin, wng daenj gij haizbaengz、haiznaeng unq. Moix baez yaek daenj gaxgonq, aeu genjcaz ndaw haiz miz mboujmiz doxgaiq wnq、ndaw haiz bingz mbouj bingz, ciengeiz gaej dam liengz cix youq ndaw ranz duet haiz loh din byaij.

Ngeih、Mad aeu habngamj. Gaej daenj gij mad yungh sunghginjdai daeuj guh haenx, wng daenj gij mad yungh faiq daeuj guh, moix ngoenz aeu vuenh okdaeuj saeg seuq dak hawq ngoenzlaeng caiq daenj.

Sam、Moix ngoenz genjcaz song cik din baez ndeu. Gyanghaemh swiq din seiz, aeu genjcaz angjdin miz mboujmiz nding、foeg、nyaeuq dek、hwnj bop、naenx sieng、hwnj gyak daengj.

Seiq、Haeujsim fajdin seuq- sak. Ngoenznaengz genhciz yungh raemxraeuj caeuq genj unq swiq din, swiq seuq le aeu sujbaq yaengyaeng mad hawq.

Haj、Raed ribdin. Ceiq ndei dwg swiq din le caiq raed ribdin, danhseih haeujsim gaej raed daiq dinj, gaej raed daengz noh rib.

Gijwnq yawhfuengz cosih miz: Moix ngoenz swiq din le faet di mba bitfiengj ndeu roengz gehdin bae, baujciz mbangjgiz hawqsauj. Danghnaeuz gaenq hwnj gyak lo, ndaej aeu gwzmeizco yenjgauh daeuj led, ganjyenj baenz gyakdin seiz, ndaej aeu 1:5000 boix ywraemx gauhmungjsonhgyaz daeuj cimq din.