Boux lauxsae gou ceiq gyaez haenx, dwg yijvwnz lauxsae ban dou, de dwg boux lauxsae ndei ndeu.

Lauxsae gou aen naj byombyetbyet, byoemgyaeuj ndaem youh miz di henj. Youq yozyau dou, lauxsae cungj gig byom, hoeng gou nyinhnaeuz lauxsae ban dou ceiq byom, neix mbouj dwg mbouj miz laizyouz.

Geiq ndaej miz baez ndeu, cozyez gou mbouj anqseiz sij ndaej, gou louz youq ndaw yozyau sij cozyez. Hix mbouj rox sij le geijlai nanz, dang gou sij cozyez sat, ngiengx gyaeuj baez yawj, daengngoenz gaenq doek roengz bya bae, mbwn fuemx roengzdaeuj, daengx aen yozyau cungj caemrwgrwg, gou ndaw sim siengj boihseiz lo, gou guh saeh baenzlawz cungj yienghneix gazgaz gwdgwd, sij cozyez yienghneix nanz, bonjlaiz siengj youq yozyau sij sat cozyez gyau hawj lauxsae cij baema, hoeng mwhneix lauxsae aiq caeux baema lo, dawz cozyez gyau gizlawz bae? Hoeng gou lij siengj sawqsawq yawj, byaij bae bangunghsiz lauxsae.

Yaek byaij daengz seiz, ndaw sim guh caeg angq hwnjdaeuj, aen dou bangungh- siz lauxsae gingqyienz lij hai dwk, gij daengrongh daj geh dou geh cueng ciuq okdaeuj. Gou vaiq yamq din byaij haeuj bakdou, ndaw bangunghsiz hoengqdangdang haenx, lij miz boux vunz he ngaemgyaeuj nyaengq gaij cozyez, sijsaeq baez yawj, neix mbouj dwg yijvwnz lauxsae ban dou ma? Gou byaij coh lauxsae, lauxsae hix ngiengxgyaeuj yawjraen gou, doiq gou naeuz:“Baenzlawz lij mbouj baema? Vunz ranz mwngz aeu damsim lo. ”Gou han naeuz:“Neix couh baema lo.”Lauxsae youh naeuz:“Baezlaeng gaej yienghneix lo, ranz mwngz liz yozyau yienznaeuz gyawj, hoeng gwnz loh hix aeu siujsim di.” Gou ngaekngaek gyaeuj, gamz raemxda byaij ok bangunghsiz.

Neix couh dwg lauxsae ban dou, vih gij yozsiz dou, mbouj goq ndangdaej swhgeij, miz boux lauxsae baenzneix ndei, gou miz gijmaz lijyouz mbouj ndeindei hagsib ne?

（指导老师：陆庆峰）