“Youq gwnz diuz loh’iq byaij baenaj……”Dou angqvauvau, simcingz gig ndei dwk it loh ciengqgo, byaij youq gwnz loh’iq bae rogndoi cawj gwn.

“Mbouj ndei lo, mbouj ndei lo, aen gu cawjngaiz vaih lo!” Gou cingq swiq haeux, Siujyingz gaem aen rek buet daeuj coh gou caemhcaiq daihsing swenj hwnjdaeuj. “Aengu cawjngaiz byoengq congh he, mwngz vaiq baema siengj banhfap.” Gou sikhaek lumj mbin nei buet daengz aen yingzdi dou, Siujfangh、Siujmeiz、Siujlienz cungj cingq siengj banhfap ne! Gou heiq baeg fofo dwk cam:“Aen gu baenzlawz la?”Siujfangh naeuz: “Byoengq congh ndeu lo.”

Baenzlawz banh? “Mbouj ndei lo!Mbouj ndei lo!” Dou cingq siengj banhfap doiqfouq, baihhaenx Siujhingz youh swenj hwnjdaeuj. “Youh baenzlawz la?” Dou caez sing cam naeuz. “Aen rek cawjbyaek hwnjmyaex, swiq mbouj ndaej lo.” Aeya! Doengzseiz bungz daengz song aen gunnanz, aenneix caengz gaijgez, lingh aen youh gaenriengz daeuj, cungj hwk dou ngawz lo.“Sien sawq cawj, danghnaeuz raemx roh mbouj lai, lij ndaej cawj ngaiz cug.” Lauxsae hawj aen cawjeiq ndeu hawj dou.Yienghneix gou dawz haeux dauj roengz aen gu bae hainduj coemh feiz. Hoeng gou ngamq dawz feiz diemj dawz mbouj nanz, feiz youh ndaep lo, yienzlaiz raemx daj aen congh roh okdaeuj, dawz feiz rwed ndaep lo. Baenzlawz banh ne? “Ra congh iq haenx, dawz dieg congh haenx demh sang couh ndaej lo.” Seiz gvanhgen lij dwg Siujhingz miz banhfap. Gou ciuq de gangj haenx bae guh, dahraix, vwndiz ndaej gaijgez lo.

Ngaiz dauqdaej cawj ndaej cug lo, hoeng, byaek baenzlawz banh? Yawjyawj doengzhag wnq bangxhenz, gyoengqde mizmbangj cawj ngaiz, mizmbangj cawj byaek, cungj yaek ndaej gwn lo, gip dwk Siujhingz youq henz cig daengh din. Cingq youq seizneix, gou yawjraen cuj doengzhag wnq bangxhenz cingq yungh fagmid heh byaek, gou fwt dwk siengj daengz aeu mid daeuj gvet gij myaex bae, cingq ndei Siujlienz daiq fagmid daeuj, yienghneix gou youh lumj mbin nei, dawz aen rek caeuq fagmid buet bae henz dah……

Caj gou swiq rek dauqma seiz, miz di doengzhag gaenq ndaej gwn lo, dou sikhaek hengzdoengh hwnjdaeuj, boux ndeu coemh feiz, boux ndeu fan byaek. Mbouj geij nanz, byaek dou hix hwnj daiz lo. Byaek yienznaeuz mbouj lai, cij miz byaekheu caeuq gyaeqgaeq, hoeng dou lij dwg gwn ndaej diemzsubsub.

Cinjbi dauqma seiz, lauxsae hawj gyoengq doengzhag gak aen siujcuj bingz faen, dou ndaej daihsam mingz, de naeuz, yienznaeuz cuj dou ngaizbyaek mbouj dwg gig ndei, hoeng bungz daengz gunnanz seiz, dou rox geij boux doengzsim, siengj banhfap gaijgez vwndiz, aen cingsaenz neix cig ndaej hagsib.

Dingq daengz gij vah neix, ndaw sim gou beij gwn dangzrwi lij van.

(指导老师：陆庆峰)