贵港市蒙公乡古山小学 六二班 韦少妹

Moix boux cungj miz gij saeh “baez daih’it” hawj swhgeij nanz- lumz, neix aiq dwg baez daih’it swiq vanj, baez daih’it ndaem byaek, baez daih’it cawj ngaiz, baez daih’it byaij loh laep, baez daih’it ciengx doenghduz iq……Hoeng gou mbouj ityiengh, baez daih’it coemh raemx- ndat hawj gou ceiq nanzlumz.

Ngoenzhaenx daxbuz bae ndaem byaek caengz dauqma, gou naengh youq ranz yawj densi, caj daxbuz ma coemh raemxndat hawj dou swiqndang, hoeng gou caj le haujlai nanz, daxbuz lij mbouj dauqma, daengngoeng couh yaek doek bya lo, haemhneix gou caeuq baengzyoux iu ndei, naeuz swiq ndang ndei le, aeu guhdoih bae ndaw dah saeg buhvaq, dayawj baengzyoux gaenq baema cinjbi lo, neix baenzlawz banh ne? Seizneix dahnuengx byaij gvaqdaeuj naeuz:“Dahcej, mwngz gojyij swhgeij coemh feiz ndat raemx ha!”Gou angq dwk naeuz:“Dwg ha, gou gojyij swhgeij guh. ”

Gangj guh couh guh, gou sikhaek aeu doengj bae ciep raemx, caen siengj gij raemx naengz sikhaek lae rim doengj, ndei hawj gou cimzcimz gij feihdauh coemh feiz. Cingq siengj, aen doengj raemx rim lo, gou yungh cik fwngz baez riuj, va! Geijlai naek ha, gou song cik fwngz gaemdawz rwz doengj, haeb heuj baez riuj, doengj riuj hwnjdaeuj lo, raemx cix feb okdaeuj, dawz vaq gou rwed mbaeq lo. Gazgaz gwdgwd, byaij yamq dingz yamq, va haujlai goengfou, gou cij dawz doengj raemx riuj daengz bakcauq, baeg dai gou lo, caiq yawjyawj song faj fwngz gou, hoengzfodfod, lumj lwed nei.

Cuengq ndei raemx le, gou aeu mbaw haeuxyangz diemj feiz dawz hainduj coemh feiz, gou laebdaeb cuengq le cib geij gaem haz, youh euj di ngafaex iq cuengq haeujbae, seizneix dahnuengx diuqlengleng buet daeuj doiq gou naeuz:“《Caet Dahsien》daengz lo, dahcej vaiq daeuj yawj ha!”O!《Caet Dahsien》gou ceiq gyaez yawj lo, haemhlwenz dahnuengx iq haenx deng duz mozvangz gaemh dawz lo, mbouj rox baenzlawz yiengh lo, caen vih de damsim ne, siengj daengz neix gou sikhaek buet bae daihding……Gou ngaezngwdngwd dwk yawj le mbouj rox geijlai nanz, cigdaengz dahnuengx iq deng gyoengq dahcej gouq okdaeuj le, cij siengj hwnj gou cingq coemhfeiz, gou sikhaek buet bae bakcauq, ndaw cauq feiz dawz liux lo, gij feiz ruenz okdaeuj, henz cauq gij haz cix deng coemh dawz lo, gou diuq hwnjdaeuj luenh daemh, mbouj geij nanz feiz cienz ndaep lo. “Geijlai yiemj ya!”Gou gag gangj gag naeuz, doeklaeng gou sousib ndei bakcauq, couh anan faenhfaenh naengh youq henz bakcauq yawjfeiz caj daxbuz ma.

Daxbuz ma lo, gou dawz gienh saeh neix gangj hawj daxbuz nyi, daxbuz mbouj gvaiq gou, naeuz gou majhung lo, rox bang daxbuz guhhong lo, couh dwg guhsaeh mbouj ndaej samsim song’eiq, baezlaeng aeu ciensim di.

“Guh saeh mbouj ndaej samsim song’eiq”, daengz seizneix gienh saeh haenx gaenq gvaqbae geij bi lo, gij vah daxbuz lij ciengzciengz yiengj youq henz rwz gou.

(指导老师：陆庆峰)