Gaenh bi daeuj, Duh’anh Yauz- cuz Swciyen cizgiz fuzciz dajndaem conhyez hozcozse, daihlig dajciengx yiengzbya、cwz(vaiz)noh daengj, coicaenh nungzminz mbanj Yauzcuz souhaeuj gig lai. Daengz dangqnaj, daengx yienh gungh miz dajciengx conhyez hozcozse 14 aen, veiyenz 140 vunz, cienzngaenz cucwz 3500 lai fanh maenz.

It dwg aeu cwngcwz youhvei fuzciz laebguh hozcozse. Aen yienh neix gonqlaeng laeb lai cungj hozcozse, baugvat mouseng、bitgaeq、cwz (vaiz)noh、yiengznoh、cunghab loih daengj 10 aen canjyez, comz swnghcanj、gyagoeng、gaicawx itheij, guh ndei swnghcanj gaxgonq、swnghcanj seiz、swnghcanj sat gak duenh cienzmienh fuzvu.

Ngeih dwg yawjnaek gisuz beizyin. Iucingj swcigih dajndaem gisuz conhgyah, gaihcanj bitgaeq fuengzbingh、vunzgoeng coqcing、byauhcunjva swnghcanj、fouzgoeng- haih dajciengx daengj gisuz beizyin. Daj bineix daeuj, daengx yienh gungh gawjbanh beizyinbanh 21 geiz, beizyin seyenz 3700 vunzbaez.

Sam dwg daphwnj canjbinj gaicawx bingzdaiz. Aen yienh neix doenggvaq gawjbanh“mingz dwz youh canjbinj canjsiuhvei”、“canjbinj duihgaivei”、“Milozdoz vwnzva meijsizcez” daengj hozdung daphwnj canjbinj gaicawx bingzdaiz. Dangq- naj, gij canjbinj dajciengx gak conhyez hozcozse gaenq gai daengz Gveicouh、Gvangjdungh、Nanzningz、Liujcouh daengj swngj(si) caeuq gij yienh yangh henzgyawj.

Ciuq gyoepsuenq, doenggvaq hozcozse gensez, seizneix gaenq daiqdoengh henzgyawj 500 lai ranz Yauzcuz guh gveihmozva fazcanj, moix bi moix hoh demsou 6000 maenz daengz 8000 maenz.

(Lanz Fuzgvanh Lanz Aicih)