Gaenh bi daeuj, Fuzsuih Yen gig yawjnaek swnjcienz、henhoh nem fazcanj vwnzva minzcuz, haeujlaeg vatgud vwnzva daegsaek minzcuz, roengzrengz dajcaux buek vwnzva yisuz daibyauj Fuzsuih、miz daegsaek minzcuz haenx, hawj vwnzva minzcuz youq lijyouz nem sevei fazcanj ndawde cungfaen fazveih cozyung.

Gaenh bi daeuj, aen yienh neix gyagiengz swnjcienz ndei“ciet lungz ngiengxgyaeuj”、 comz eu fwen、 gaeqdoxdoj、cietyouzsaenz、cietfung- sou daengj ngoenzciet vwnzva minzcuz, baez daengz ngoenzciet couh cizgiz gaihcanj mizgven hozdung. Henhoh fouxdiegliengj、ciengq vaizcin nem ndangdaenj Yauzcuz daengj yisuz ndawbiengz.

Youq seiz haeujlaeg vatgud vwnzva daegsaek minzcuz, Fuzsuih Yen comzrengz ganq daegsaek vwnzva canjyez, lumjnaeuz yawjnaek fazcanj vehganjhaeux Luz Civeih. Vehganjhaeux Luz Civeih youz bouxroengzgang Luz Civeih veh, de supaeu gij daegsaek vwnzva minzcuz Fuzsuih, cauh’ok meijsuz gunghyibinj gig gyaeundei haenx. Daj bi’gvaq daeuj, Luz Civeih dawz vehganjhaeux dangguh hangh saehnieb he daeuj guh. Seizneix miz gizdieg guhveh 160 bingzfanghmij, bi guh 1000 lai fuk vehganjhaeux, bingzciengz moix fuk veh gai 300 maenz daengz 12000 maenz, gai doh daengx guek.

(Liengz Cenzdungh)