●Daj bi’gvaq haggeiz seizcin daeuj, Nazboh Yen heij guh lajmbanj yivu gyauyuz hagseng yingzyangj gaijndei giva. Bi’gvaq roengz 822 fanh maenz. Daengx yienh doenghboux hagseng ndaej bang haenx 17124 vunz, ndawde, siujyoz 12111 vunz, cuhcungh 4972 vunz, daegbied gyauyuz hagseng 41 vunz. Bineix, baihgwnz roengz 706 fanh maenz, 17227 vunz souh’ik, ndawde, siujyoz 14084 vunz, cuhcungh 3143 vunz.

(Hij Dwzhoz)

●Geij ngoenz gonq, Yungzsuij Myauzcuz Swciyen aeu gij fwen ngaih rox、vunzlai maij dingq haenx bienyaenq bonj saw“gvancez Dangj Cibbet Daih cingsaenz”. Dangqnaj, gaenq yaenq 6000 bonj, mienxfeiq fat daengz gak danhvei、yangh(cin)、cunh mbanj.

(Veiz Lonzcih)

●Lozyez Yen youq 2013 nienz yienh caizcwng yawhsuenq ndawde anbaiz le yienh bonj gaep saujsu minzcuz fazcanj cienzngaenz 5 fanh maenz、saujsu minzcuz gyauyuz cienhangh cienzngaenz 5 fanh maenz、minzcuz cienhangh cienz- ngaenz 14 fanh maenz. Cujyau yungh daeuj gaijgez gij nanzdaez daegbied dieg saujsu minzcuz fazcanj ginghci bungzdaengz haenx.

(Vangz Caijlonz)

●Majsanh Yen Gujcai Yauz- cuz Yangh gig yawjnaek hong gaijguh ranzyiemj lajmbanj, daj 2009 nienz daeuj, daengx yangh gaenq guhsat hong gaijguh ranzyiemj 1113 hoh, bangcoengh cienzngaenz 1800 lai fanh maenz, 4500 lai vunz souh’ik.

(Lanz Cinzlu)

●Bineix geiq daih’it, Yilinz Si daengx si gij minzcuz canjbinj giyez ndaej yiengjsouh cienzngaenz louzdoengh youhvei daigvanj leihsik haenx daj bi’gvaq 3 aen gya daengz 6 aen, gungh yiengjsouh youhvei leihsik daigvanj 3.65 ik maenz, ndaej diep leihsik 255 fanh maenz.

(Cwnz Yinanz)