Daxboh bingzseiz gyaez cit ien, baez guh sat hoeng naek, mbouj lienz cit song sam diuz cungj mbouj dingz, de naeuz cit ien ndaej gaij naetnaiq.

Miz ngoenz he, daxboh dawzrauq dauqma, buh uq haiz uq hix mbouj vuenh, baeb naengh gwnz sahfaz bae, mbon ok bau ien caeuq aen habfeiz, youh ndaek gaemz ndaek gaemz cit hwnjdaeuj lo, lumjnaeuz geijlai bi mbouj cit lo. Sawqmwh, daxboh dawz aenbak mbwnj luenzlili, raq hoenz ndeu byoq okdaeuj, gawqyienz ndaej baenz aen baenz aen gyongx, aen hung dauq aen iq, yawj hwnjdaeuj lij gig mizyinx ne.

Sawqmwh, daxboh dawz aen bak doiq cinj gou daeuj, haenqrengz baez byoq, gyongx hoenz lumj swjdan nei nyingz haeuj aen naj gou daeuj. Gou saekwk dwk ae mbouj dingz. Gou hemq hwnjdaeuj：“Mwngz caiq byoq gou couh naeuz daxmeh nyi lo.”Daxboh cij vaiq dingz roengzdaeuj, itmienh vadfwngz itmienh naeuz:“Gou mbouj byoq lo, mwngz gaej lwnhnaeuz meh mwngz nyi o.”Daxboh youh dawz diuzien oet haeuj ndaw bak bae, sup ndaek gaemz hung ndeu, caiq haep aen bak ndei, gij hoenz gawqyienz ndaej daj song congh ndaeng de mauh okdaeuj, lumj hojceh byoq hoenz nei. Daxmeh sawqmwh daeuj daengz henzndang, daxboh vaiqvet gveng diuzien roengz doem bae, yungh fajdin caij ndaep lo.

Daxmeh yawjraen dingjgyaeuj daxboh hoenz lij caengz sanq, youh nauh hwnjdaeuj lo:“Gangj mwngz bak mbat lo mwngz cungj mbouj gaij, cungj lij caeg cit. Cit ien miz gijmaz ndei, bwt ndaem fwngz henj, bibi coemh bae sam seiq cien maenz ngaenz, gij ngaenz ranz raeuz cauh ndaej vaiq dwg lwi?”Daxboh ngoem gyaeuj roengzdaeuj, mbouj han saek coenz vah.

Gij vah daxmeh miz dauhleix, hoeng daxboh haengjdingh lij caeg cit, siengj hawj daxboh gaiq ien, vanzlij aeu roengz haujlai sim cij ndaej ha.

(指导老师：梁青云)