Ngoenzneix, doengzhag yozyau wnq daeuj yozyau dou beij giuzgi.

Ban dou dwkgiuz ceiq ndei dwg: Siujrungz、Siujyangz、Siujbeuh、Siujvang、Siujyungj, mboujdan youq ban dou, couh dwg youq daengz aen yozyau, gyoengqde hix suenq ceiq ak.

Gyaq ci menbauh ndeu hai haeuj yozyau daeuj, dingz youq laj gorungz hung, bakdou ci hai lo, roengzdaeuj bang dahsau ndeu, dou doeksaet yat, gyoengqde hix daiq yawjsiuj dou lo, gingqyienz heuh dou lwgsai caeuq lwgmbwk bijsai dwkgiuz, mboujgvaq, bang lwgmbwk neix, bouxboux youh sang youh hung, yawj hwnjdaeuj gig miz rengz, bonjlaiz dou siengj gangj di gijmaz, yawj daengz neix, dou gijmaz vah hix gangj mbouj ok lo.

Bijsai lo, diuq giuz seiz, ban dou lingx sien ndaej giuz, gyoengq lwgmbwk haenx gig mbouj fugheiq, gyoengqde song boux geb boux ndeu dawz giuz ciengj deuz lo, hoeng dang gyoengqde cienz giuz seiz, ban dou Siujvang baez diuq, youh dawz giuz ciengj gvaqdaeuj, dah cienz giuz haenx doeknaiq dangqmaz, de sikhaek daeuj lanz Siujvang, Siujvang mbouj caj de daeuj gyawj, dawz giuz cienz hawj Siujbeuh, Siujbeuh baez ciep ndaej giuz couh lumj naq nei cung daengz laj lamzbanj swhgeij, dawz giuz baez yut gveng okbae, “song faen!”Dou dawz sing bekfwngz gokroeb soengq hawj de.

Youq ndaw bijsai, gyoengq lwgmbwk cujyau yungh“samgakhingz”fap, couh dwg boux ndeu yinh giuz, song boux youq baihnaj baujhu, sam boux cujbaenz aen samgakhingz ndeu, sojyij gou heuh de guh“samgakhingz”fap. Ban dou giuzyenz deng “samgakhingz”fap dwk luenh, gaej gangj ndaej faen, lienz giuz cungj bungq mbouj ndaej, gyoengq lwgmbwk haenx lienzlienz ndaej giuz.

Seizneix bijfaen dwg 4 beij 4 bingz, dou gig mbouj gamsim, lwgmbwk fat giuz, deng Siujyungj ciengj ndaej, song boux lwgmbwk sikhaek homz gvaqdaeuj lanz, Siujyungj yungh aen gyaj dungcoz, dawz song boux lwgmbwk vut youq doeklaeng, de mbouj caiq cienz giuz, cig cung lamzbanj, baez gveng aen giuz, youh ndaej song faen, lauxsae caeuq doengzhag cungj lienzlienz hemq ndei.

Lwgmbwk youh yungh hwnj “samgakhingz”fap, baezneix doengzhag sai dou hag gvai lo, yungh “samgakhingz” doiqfouq “samgakhingz”, lwg- mbwk couh lumj duzguk daengz diegbingz, miz rengz ok mbouj ndaej.

Bijsai couh yienghneix gaenjcieng dwk, song mbiengj giuzyenz mwngz mbouj nyiengh gou, gou mbouj nyiengh mwngz, bijfaen youh caiq dwkbingz, hoeng youq seiz satlaeng, gyoengq lwgmbwk haenqrengz douz ndaej sam faen le, seizgan couh daengz lo, lwgmbwk beij lwgsai lai faen ndeu, hingz ndaej gig yiemj. Ban dou giuzyenz heiq baegfofo naeuz:“Saetnaj lai lo, baezlaeng raeuz itdingh aeu hingz.”

(指导老师：陆庆峰)