□ Ouh Caijfangh/欧彩芳

Moix bi daengz ciet ngux nyied co’ngux, mbanj gou ranzranz cungj aeu guh haeuxywed ma gwn. Haeuxywed dwg cungj faengx ndeu, youq dieg Cungzcoj Si, gyoengqvunz daengz ndwen ngux cij guh.

Guh haeuxywed dwg yiengh hong saeqsim ndeu. Guh haeuxywed, aeu miz faexmujgingh (vunz Lungz- couh heuhguh faexban) gonq, gode maj youq henz naz henz loh, gyoengqvunz ra ndaej gode ma le aeu daeuj coemh baenz daeuh, caiq dawz daeuh neix do roengz caengx bae, ndingq raemx roengzbae, hawj raemxdaeuh menhmenh ndik ok- daeuj liux bae, yienzhaeuh aeu bae cawj, cawj goenj le couh ndingq okdaeuj, seizneix caengh ndaej cuengq haeuxcid roengzbae cimq, cimq 4 aen cungdaeuz doxhwnj. Guh sat gijneix couh hainduj bau haeuxywed lo. Yungh donh faexcuk ma guh vunq, aeu rongfaengx roxnaeuz rongcing swiq seuq haenx gienj donh faexcuk neix baenz diuz, guenq haeuxcid roengz ndaw faexcuk bae, yienzhaeuh yut faexcuk okdaeuj, aeu cag cug ndei couh ndaej lo. Bau haeuxywed ndaej le couh roengz moj bae cawj, aeu cawj 10—12 aen cungdaeuz cij ndaej.

Gwn haeuxywed aeu caemj raemxdangz roxnaeuz raemxdangz- rwi, baenzneix haeuxywed mbouj- danh yawj hwnjdaeuj henjrwg youh ronghcingx, gwn hwnjdaeuj hix ndei geux youh vandiemz, lij miz feihhom mbawrongfaengx dem.

Faexmujgingh、rongfaengx、dangzrwi cungj ndaej cawz bae ndangndat bouxvunz, hawj ndang- daej raeuz bienq liengz, sam yiengh doxgaiq neix gap hwnjdaeuj sawj haeuxywed youh ndeigwn youh ndaej guhyw, gou siengj, neix couh dwg vihmaz gyoengqvunz gyaez youq seiz ngux nyied dienheiq ndat neix gwn haeuxywed ba.