□ Hoz Saubangj sij Cinz Siengzcouh Liuz Gingliuj Cinz Siengzgen hoiz

16、Cazyawj Hawciengz Ndwen- cieng

Bi 1963 ngoenzyenzdan ngamq gvaq, Veiz Gozcingh caemh ngamq bae Sinhcinh Suijdencan yawj gyoengq cizgungh caeuq genjcaz hong dauqma Nanzningz, youh muengz caeuq boux suhgi guenj caizmou Ho Hihmingz ngeixyaeng gij saeh hawciengz ndwen- cieng gunghawj haenx.

“Lauj Ho, yaek gvaq cieng lo, gij huq gunghawj gvaq cieng bwh ndaej baenzlawz yiengh?”

Ho Hihmingz naeuz:“Ndwengonq gou caeuq gij bumwnz caizmou hai gvaq baez hoih ndeu, cienmonz ngeixyaeng gij saeh gunghawj gvaq cieng. Gaicawx、gunghsiuh caeuq haeuxgwn geij gaiq neix dou cungj siengj lai ra di huq, hawj vunzlai ndaej gvaq ndei cieng.”

Veiz Gozcingh naeuz:“Aen banhfap neix ndei lai, guh hong caizmou cix wnggai lai naemj hawj vunzlai. Song sam bi gonq, fusizbinj gunghawj gaenjcieng, hawciengz youh gai ndaej bengz, vunzlai mbouj ndaej gvaq ndei cieng, seizneix ginghci yaengyaeng dauqndei lo, raeuz aeu youq gunghawj gijgwn fuengmienh guh ndaej fungfouq di, sawj vunzlai gvaq ndei cieng.”

Ho Hihmingz gangj le mbangj gidij cingzgvang de rox haenx, de naeuz, ra huq lij nanz, gij soqmoeg caeuq binjcungj gihgvanh ganbu、vunzyouq ndaw singz baengh biuq gunghawj haenx lai gvaq bigonq, hawciengz caemh gyangqgyaq. De naeuz: “Cijaeu guh ndei hong, vunzlai cix rox habhoz.”

Veiz Gozcingh doiq Ho Hihmingz guh anbaiz mbouj miz maz yigen: “Yienghneix cix ndei, itdingh heuh gij dungzci bumwnz caizmou sijsaeq、maenhsaed guh hong, hawj vunzlai ndaej angqyangz gvaq cieng.”

(caengz sat)