Miz ngoenz singhgiz ndeu, daxmeh doiq gou naeuz:“Ngoenzneix mwngz youq ranz mbouj miz saeh, caeuq gou bae gai byaek, ndei lwi?” Gou angq dwk dapwngq daxmeh:“Ndei ha!”

Gou caeuq daxmeh rap byaek daeujdaengz gwnz haw lo, ngoenzneix vunz caen lai, song henz haw baij gak cungj gak yiengh doxgaiq, giz gai noh, giz gai bit gaeq, giz gai haeux, giz gai buhvaq…… Gig hoengh. Gou caeuq daxmeh gig mbouj yungzheih ra ndaej dieg ndeu dingz roengzdaeuj. Dou ngamq cuengq rap roengzdaeuj, couh miz geij boux humx gvaqdaeuj cam gyaqcienz lo. Gou han naeuz:“Sam gak gaen ndeu.” Boux daxheiz he dingq le, maeuq roengzdaeuj genj geij go byaekhau oiq hawj daxmeh caengh, daxmeh baez caengh naeuz:“Sam gaen buenq.” Boux daxheiz haenx daj ndaw daeh mbon ok song maenz ngaenz hawj gou, gou ciep gvaq ngaenz, caj daxmeh suenq cienz byaek, hoeng de youh muengz caengh byaek hawj gij vunz wnq. Gou cijndei sawq suenq, moix gaen byaek sam gak, sam gaen buenq dwg geijlai cienz ne? Caen nanz ha, mbouj miz bit caeuq ceij, baenzlawz guh ne? Seizneix, gou cix ienqhoij, lauxsae son baenzlawz suenqmboek, gou mbouj dawz haeuj rwz, mbouj rox suenq lo. Seizneix boux daxheiz haenx coi gou doiq cienz lw hawj de, gwnz gyaeuj gou hanh conh okdaeuj lo. Boux daxau ndwn youq henz yawjraen le gig dungzcingz dwk cam gou:“Siuj baengzyoux, mwngz dwg ngeih nienzgaep hagseng ba?” Gou cungj baenzneix hung baenzlawz cij doeg ngeih nienzgaep? Gou mbouj gamj hoizdap. Gou caegcaeg cim gij vunz baihhenz, gyoengqde cungj yawj gou, lumj dwg riu gou nei, gou gamjdaengz gig najmong. Boux daxau yawj gij yiengh najhawq gou, doiq gou naeuz:“Siuj baengzyoux, mbouj yungh gip, gou bang mwngz suenq, moix gaen sam gak, sam gaen gouj gak, buenq gaen gak haj, itgungh dwg maenz lingz haj faen.” Gou docih dwk ngaekngaek gyaeuj, vaiq doiq gouj gak haj faen ngaenz hawj boux daxheiz haenx.

Youq gwnz loh baema ranz, ndaw sim gou nanznanz mbouj ndaej dingh roengzdaeuj, sim siengj hagsib mbouj ndaej lujlaj, aeu lauxlaux saedsaed bae hag, cij hag ndaej caen bonjsaeh, majhung le cij baenz boux vunz miz yungh ndeu.