Youq aen gvihciengz ndaw gyausiz raeuz, itcig cuengq miz aenliengj hoengz gaeuq ndeu. Gou mbat daih’it yawj daengz aenliengj neix, dwg yozgiz gonq ngoenz fwn ndeu. Cuengqhag seiz, doengzhag Banh Li’gyauh gang aenliengj neix baema ranz. Gou yawj dwk, roxdaengz gig geizheih, vunz de baenz iq, vihmaz gang aenliengj baenz hung ne?

Bi’gvaq seizdoeng fwn daegbied lai. Mbwn, doek fwn hung, gou naengh youq gwnz danci daxboh, gwnz gyaeuj cw fan youzceij. Sawqmwh dingqnyi miz vunz heuh gou, gou biengj fan youzceij le baez yawj henz roen, yenzlaiz dwg Banh Cinleiz. Yi, vihmaz aen liengj de gang haenx caeuq geij ngoenz gaxgonq aen Banh Li’gyauh gang haenx ityiengh ne? Gou gig geizheih，sim siengj, doengzhag ban dou vihmaz cungj gyaez gang aenliengj hung yiengh neix ne?

Singhgiz seiq, lwnz daengz gou dang cizyizswngh lo, gou uet gvihciengz seiz, youh yawjraen aenliengj hoengz neix. Gou nyaenx mbouj ndaej youh ngeix hwnjdaeuj: Vihmaz miz aen- liengj yienghneix?

Doeng bae cin daeuj, raemxfwn engq lai lo. Ngoenzneix banhaet, mbwn lij ndei, gvaq le byonghngoenz, cix doek fwn hwnjdaeuj. Fwn yied doek yied hung, gou mbouj miz liengj, mbouj ndaej ma ranz. Cingq youq seizneix, banhcujyin yawjraen gou ndwn youq bakdou gyausiz, rox gou mbouj daiq liengj, gipmuengz naeuz：“Mbouj youqgaenj, ndaw gyausiz miz aen liengj ndeu, mwngz gang baema ranz ba!”Gangj dwk de buet daengz gyausiz, aeu aenliengj ndenq hawj gou, caiq caenciet doiq gou naeuz：“Gang vei, vaiq baema ranz ba!”Gou ciep gvaq liengj baez yawj, ya! Caeuq aen liengj Banh Li’gyauh、Banh Cinleiz gang haenx doxdoengz. Seizneix, ndaw uk gou sikhaek yienh’ok aen vwnhau hung ndeu, neix dwg vih gijmaz, nanzdauh dwg doengz aen liengj ma? Aen de youh dwg aen byawz ne? Gou caeuq banhcujyin naeuz le coenz “caiqraen”couh gang liengj baema lo. Youq gwnz roen, gou itcig ngeix aen vwndiz neix, gietdingh ngoenzcog daengz hagdangz loengh cingcuj.

Ngoenz daihngeih gyang- haet, gou couh hainduj diucaz ndaw ban miz geijlai boux doengzhag miz aenliengj yienghneix. Cam Banh Cinleiz, de naeuz：“Mbouj dwg aen gou, neix dwg banhcujyin ciq hawj gou.”……Doeklaeng, ndaw ban miz dingzlai vunz naeuz yungh gvaq aen liengj yienghneix, hoeng cungj naeuz mbouj dwg aen bonjfaenh. Yenzlaiz daihgya dwg yungh doengz aenliengj, aenliengj neix cix dwg aen banhcujyin. Dapanq dauq- daej ra raen lo!

Liengj ha liengj, mwngz yienznaeuz dwg yienghhaenx mbouj hwnjda, hoeng fanjyingj ok le gij gyaez banhcujyin lumj gim ityiengh. Mboujguenj yawj daengz mwngz, roxnaeuz dawz mwngz, gang mwngz, cungj rox hawj gyoengqraeuz siengj hwnj lauxsae.

Docih mwngz, lauxsae.

（指导老师：黄雪丽）