Saeh yinx seiziq lai raix- caix, ciengzseiz fangzhwnz loq raen saeh yinx seiziq. Nanzlumz seiziq, mwhhaenx, dou cungj bien haujlai gojgaeq gyaeundei. Miz doengh duznon、aen vanzgi he、baez fatyienh he ……Gijneix yawj hwnjdaeuj daegbied iq, hoeng ndawde miz gij vaiqvued raeuz, ndawde saekmwh miz saehhuk, hoeng gou ciengxlwenx mbouj caiq guh lo .

Geiq ndaej seizhah ngoenz he, gou caeuq dangzcej bang daxbuz guh ceizraemxrouh, yaep iq he, baenz aen baenz aen ceizraemxrouh hausumsum nyaenj ndei lo.

Mwngz yawj, “doenghduz gvaiq” ndaw ceizraemxrouh cungj dwg gij dinfwngz gou caeuq dangzcej, ginggvaq daxbuz gyagoeng, ceizraemxrouh bienq baenz luenzlili lo. Daxbuz dawz “duzgvaiq iq” dou nyaenj haenx gyagoeng ndei le, daengq dou dawz ceizraemxrouh cawj ndei, gangj sat, daxbuz byaijdeuz lo .

Gou sim siengj: Daxbuz ciengzseiz naeuz gou caeuq dahcej mbouj rox guh hongranz. Seizneix, dou miz aen gihvei he doenghfwngz, mbatneix, itdingh hawj daxbuz da biengjbat. Yienghneix, gou daekeiq hwnj- daeuj, sien riuj rek bae coux raemx, yienzhaeuh dawz ceiz- raemxrouh cuengq roengz ndaw rekraemx bae. Sawqmwh, doenghgij ceizraemxrouh iqet luenzlu haenx siusaet lo, bienqbaenz le rek raemx dang hausupsup he, gou doeksaet lo, dahsing hemq:“Ceizraemxrouh mbouj raen lo, ceizraemxrouh mbouj raen lo!” Daxbuz dingqnyi le, sikhaek buet gvaqdaeuj, daxbuz yawj le yawj gij ceizraemxrouh ndaw rek, daej riu mbouj dwg, naeuz:“Dahlan huk ha! Mbouj dwg yienghneix cawj ceizraemxrouh ha, aeu caj daengz raemx goenj cij ndaej dawz ceizraemxrouh cuengq roengzbae, mwngz yienghneix cawj, ceizraemxrouh couh nem lo yungz lo, rox lwi? ”Gou lij miz di mbouj fug, han naeuz:“Cawj ceizraemxrouh mbouj dwg sien cuengq raemx, caiq cuengq ceizraemxrouh ma? Raemxgyoet caeuq raemxndat miz maz mbouj doengz ne.” Daxbuz sim unq hoz swnh doiq gou naeuz:“Baezlaeng cawj ceizraemxrouh ha, cienfanh mbouj ndaej yungh raemxgyoet cawj, danghnaeuz yungh raemx- gyoet cawj, ceizraemxrouh couh yungz baenz souh liux lo, nanzdauh mwngz nyaenxsim yawj ceizraemxrouh siusaet bae la?” Dingq le gij vah daxbuz, gou sim fug liux lo, han sing he:“Mbouj nyaenxsim.”

Siengj daengz saeh yinx seiziq, gou couh nyaenx mbouj ndaej riundumj hwnjdaeuj. Seiziq gou geijlai nomj, geij lai diencaen mbouj roxsoq ha!

(指导老师:莫丽珍)