Gou miz daegnuengx ndeu, bineix ngamq ndaej song bi buenq. De daegbied haengjgyaez gingjcaz daxau. Cijaeu ndaw densi miz gingjcaz daxau, de couh di ndeu mboujdoengh dwk cimyawj. Mboujgvaq, de caen lumj gingjcaz daxau yienghaenx mbeilaux ne!

Daegnuengx cibfaen haengj doengh, aenvih vunz iq, gingciengz laemx. Hoeng de coengzlaiz mbouj daej. Laemx lo, de cungj dwg itmienh gangj “lwg’iq gingjcaz daxau”, itmienh swhgeij benz hwnqdaeuj. Daegnuengx gij hawj vunz boiqfug haenx, vanzlij dwg gienh saeh dwk diuqcim haenx. Mbat haenx, daegnuengx ae lai, daxmeh cijndei soengq de bae yihyen. Lij mbouj caengz haeuj bakdou hung, daegnuengx couh daej hwnjdaeuj lo. Daxmeh gangj: “Ndaw dungx lwg’iq miz ‘non’ lo, gangjnaeuz mbouj hawj canghyw yawjyawj, lwg’iq couh deng bingh lo, couh guh mbouj ndaej ‘gingjcaz daxau’ lo. Lwg’iq lij siengj guh ‘gingjcaz daxau’ lwi?” “ Siengj guh.” Daegnuengx doq rih raemxda doq naeuz. “Yienghneix hawj mbouj hawj canghyw yawj?” “Hawj, hoeng lwg’iq mbouj dwkcim.” Daegnuengx sing iq dwk gangj. Canghyw genjcaz aen ndang daegnuengx sat le, naeuz yaek dwk diuqcim. Mbatneix daxmeh couh damsim lai lo, daxmeh doiq daegnuengx gangj:“Lwg’iq dwg gingjcaz daxau lwi? Gingjcaz daxau dwkcim mbouj daej bw.” Siengj mbouj daengz daegnuengx cengq cehda hunghung dwk gangj: “Lwg’iq dwg gingjcaz daxau， lwg’iq mbouj daej, lwg’iq mbeilaux, dawz ‘duznon’ gaeb deuz.” Nyex ndaej gyoengq husw cungj riu liux lo. Miz boux husw gaem fag cim dwk, hawj daxmeh caeuq lingh boux husw gaemh daegnuengx, daegnuengx youh gangj: “Lwg’iq dwg gingjcaz daxau， lwg’iq mbouj daej, lwg’iq mbouj doengh, lwg’iq mbeilaux.” Daegnuengx caen dwg sing ndeu mbouj daej, di ndeu mbouj doengh dwk hawj husw dwkcim lo.

Neix couh dwg daegnuengx gou, boux daegnuengx mbeilaux ndeu, boux daeg- nuengx haengjgyaez guh gingjcaz ndeu.

Nyienh daegnuengx maj hung maj cangq, daengzcog guh boux gingjcaz daxau caen ndeu.