Seiqvunz miz haujlai baez “baez daih’it”___Baez daih’it naenghci, baez daih’it yawj denyingj， baez daih’it cawjbyaek, baez daih’it guh’angq, baez daih’it guh soujgoeng, baez daih’it deng sieng……Gou hix miz haujlai baez daih’it, hoeng, youq haujlai baez daih’it ndawde，miz baez ndeu cix sawj gou nanznini lumz mbouj ndaej，seizseiz geiq youq ndaw sim ……

Haenx dwg ngeih nienzgaep aen couhmoz he, gwn caeuz le, daxmeh yaek bae bangunghsiz gyaban, gou hix caeuq de itheij bae lo. Youq ndaw bangunghsiz daxmeh hwnjvangj, dwk yaep youzhi le, couh mbouj miz gijmaz saeh yinxdouz guh lo, gou couh siengj ma ranz lo. Hoeng gou baez ngeix daengz youq gwnz loh ma ranz yaek caeuq duzfangz duzgveijgvaiq dox- hoenx, gij giva gou sikhaek deng dub soiq. Gou moenghmangh muengh bingzmuz dennauj myab mbouj dingz haenx, youq ndaw sim hoenx bae hoenx dauq. Miz aen sing ndeu naeuz：“Baema ba！Baema ba！” Lingh aen sing hemq naeuz：“Vihmaz baema？Louz youq gizneix mbouj ndei ma?” Daih’it aen sing youh yiengj hwnj- daeuj, beij haxbaenh engq leixhaih lo：“Baema! Yienghneix mboujdanh ndaej guhbaenz saeh mwngz siengj guh haenx, caemhcaiq ndaej lienh mbei mwngz！” Lingh aen sing mizdi saenz：“Gaej baema……”Sing cauz yienghneix hawj gou simfanz. Daxmeh yawjraen simsaeh gou, riu naeuz：“Caj mbouj ndaej le, baema gonq ba!” Gou gipmuengz ngauz gyaeuj. Daxmeh raen le nyaeuq meizda naeuz：“Mbouj gamj ma？Yienghneix mwngz couh caj aen daengz song aen cungdouz caeuq gou itheij baema lo.” Gou itcig gyaez aeunaj dangqmaz, swhyienz souh mbouj ndaej daxmeh lengx：“Bae……Bae couh bae！”

Byaij ok bangunghlaeuz, rumz lumj fag cax raeh, coeg naj gou in bae, yawj diuz roen hung laepcupcup haenx, gou youh simhaw lo. Gou yaekyaek yoemyoem ndonj haeuj ndaw laep bae, byaij ndaej simdiuq budbud. Sawqmwh, baihlaeng gou myanz ok mbangj ronghsag ndeu, nyingz youq gwnz faex doiqmienh, ingj ok le gij nye faex doengh, gou annaeuz dwg gijmaz iugvaiq, ganjgip gyavaiq yamqdin, hoeng cungj gamjdaengz baihlaeng gwnz faex miz “iugvaiq” cingq cim gou, gou hix goq mbouj ndaej yienghsiengq swhgeij, yat din couh buet, caj daengz cwngqmingz duz “iugvaiq” haenx yawj mbouj raen gou le, cij baegfofo dingz roengzdaeuj. Gou yawjyawj seiqlengq, baenz benq yaemsisi, nyaenx mbouj ndaej siengj hwnj gij goj fangz. Henz rwz gou lumj miz gij sing hemq coegrwz doenghduz yakrwix, cik ga gou saenzgywggywg, siengj yamq okbae gannanz raixcaix.

Gou menhmenh byaij, daeuj- daengz laj daeng henz roen, sawqmwh yawjraen baihlaeng miz duz ngaeuz he cingq gaen gou. Ndaw uk gou sikhaek miz aen siengjfap he, nanzdauh dwg miz boux vunz he cingq riengz gou？Gou di cungj mbouj ngeix caiq ndonj haeuj ndaw laep bae, menhmenh yiengq gij fuengyiengq haxbaenh fatyienh ngaeuz ndaem haenx byaij bae, boux vunz haenx baenzlawz mbouj raen ne？Gou nyeux gyaeuj bae, sawqmwh fatyienh boux vunz haenx cingq youq baihlaeng gou, hoeng sijsaeq yawj youh mbouj lumj. Gou cimyawj haujlai nanz cij roxnyinh gij mienhmoeg de——gij ngaeuz gou, gou youh doengngeix saengeix, caiq gangj gwnz seiqgyaiq baenzlawz miz fangz ne. Aen sim gou diuqbubbub haenx andingh lo, yamq hung dwk byaij hwnjdaeuj, gig vaiq couh ma daengz ranz lo. Ngamq haeuj bakdou, denva daxmeh couh daengz lo. Dingqnyi gij sing gou, daxmeh mingzyiemj soeng gaemz heiq he:“Swnhleih madaengz ranz la？Gou aiqnaeuz daeg lwg gou deng iugvaiq gwnz lo!” Dingq le gij vah neix, gou nyaenx mbouj ndaej riumbw mbat he.

Ginglig baez daih’it yienznaeuz gig yiemj, gig lau, hoeng youh dwg gij banhfap ndaej muzlienh cihgeij. Gienh saeh neix sawj gou ciuhvunz nanz- lumz, aenvih de beizyangj naengzlig gou, muzlienh yici gou.

Maenh’ak dwk bae sawqsawq baez daih’it miz yiyi, de rox sawj gij swnghhoz mwngz engqgya fungfouq lai saek bw！