Rumz liengzsoemsoem, haetromh lajmbanj caen gyaeundei, mbouj saenq mwngz bae yawjyawj ba.

Byaij youq gwnz doenghnaz, dauqcawq cungj dwg nywjheu dumzsubsub, haeuxyangz heusausau. Moix ngoenz haetromh, gwnz nywj cungj miz haujlai raemxraiz, lumj baenz naed baenz naed caw nei. Ngamq byaij yaep ndeu, dinvaq couh dumz lo. Muengh giz gyae, baenz benq baenz benq reih haeuxyangz lumj baenz gaiq baenz gaiq feijcui hoemq youq ndaw doenghnaz. Giz gyae, daengngoenz loh ok buenq aen naj, seizhaenx nditrongh saj rim gwnzdieg, gij raemxraiz gwnz nywj baez myab baez myab, lwenqda raixcaix. Haetromh, mok caengz sanq, seizneix byaij haeuj ndaw reih haeuxyangz bae, lumj byaij haeuj ndaw diegsien ityiengh, caen dwg lueg bya hopngomx, roeg heuh va rang ha! Gij nywj heu faex heu gwnz doenghnaz geijlai dwggyaez, doenghnaz mbouj ged saekdi, dawz gij heu de mbouj louz saekdi dwk baij okdaeuj, sawj vunz simsoeng dangqmaz.

Sawqmwh, raq rumzliengz ndeu ci daeuj, gou engqgya roxnyinh cihgeij lumj youq dieg- sien ityiengh, yaengyaeng mbin dwk.

Gij haetromh gyaeundei laj- mbanj, gou gyaez mwngz, mwngz hawj gou daiq daeuj nauhyied.

(指导老师:梁 春)