(ciep geizgonq)

Aenvih gangjvah cab Cuengh, gou deng mbangj lauxsae riu gvaq, deng baengzyoux Bouxgun riu gvaq, hix dwg aenvih cab Cuengh, youq diegrog, gou baez gangj coenz vah bujdunghva Vahgun, vunz couh naeuz gou dwg vunz “liengjguengj” (Guengjdoeng caeuq Guengjsae), caen mbouj cwxcaih ha! Vihliux hag ndei vah bujdunghva Vahgun, gou boux gaenq 40 bi neix, lumj lwgnyez hag gangj vah nei roengzrengz hag lienh fat sing, lienh ndaej aenbak naetnaiq liux, diuzlinx hwnj bop, mizseiz youq ndaw fangzhwnz lij daihsing gangj vah bujdunghva Vahgun. Hai, caen hojlienz lai lo, yienghneix doxdingj baez nanz, aenlinx caeuq heuj doxmoeb hwnjdaeuj, ukgyaeuj luenh liux, naengbak doxdaj, aengyaeuj raengrwd, gig nanzsouh ha!

Baihdoeng ndit ok baihsae fwn doek, naeuz dwg fouzcingz goj mizcingz. Mwh bungzdaengz boux caeuq gou ityiengh gangj vah cab Cuengh seiz, aen’uk gou yaepyet couh singj gvaqdaeuj, miz cingsaenz raixcaix, lohnaemj gou doengradrad, gangj gij vah hwnjdaeuj myaiz sinzcancan, raeuzradrad, cingsaenz dangqmaz. Yienghneix, gou rox daengz aen dauhleix ndeu daeuj: Cab Cuengh dwg boux cab Cuengh dou ndawde miz diuz cag lamh dou ndeu, dwg gij cingzgamj doxbaengh gyoengq Bouxcuengh gangj vah cab Cuengh dou, hix dwg sing Cuengh caem youq ndaw sim gyoengq Bouxcuengh gangj vah cab Cuengh dou, dwg aensingq gyoengq Bouxcuengh gangj vah cab Cuengh byaij baek gvaq namz dou.

Youq gwnz dieg cab Cuengh raeuz, miz gij sing gyoengq lwgnyez doxheuh doxiu de, miz gij vah daxmeh youq laj yiemhranz doxdaengq de, miz baenz aensim gyoengqvunz mbanjranz de, miz gij vah doxdaengq doxnai mehyah bouxlwg de. Cab Cuengh lumj aensim deng daengngoenz dak ndaej raeujrup nei, lumj ciengz raemxfwn rwed gomiuz nei, lumj aengangjvanh baujhoh aenruz iq nei! Mboujlwnh youq baihbaek baihnamz, roxnaeuz dwg youq gwnzbiengz gizgyawj gizgyae, cab Cuengh gizgiz cungj youq, gizgiz cungj miz, de hawj gij vunz cab Cuengh boux najseng youq doxliz cien bya fanh haij bienq ndaej caenndiep doxsug, hix sawj bouxvunz cab Cuengh youq gwnzroen lijyouz gig baeg gig naiq haenx daiq daeuj raeujrub, daiq daeuj angqyangz.

Seizneix, gou mbouj caiq aenvih gangj vah cab Cuengh couh gag yawj mbouj hwnj swhgeij, hix mbouj aenvih gangj vah bujdunghva Vahgun vunz dingq mbouj rox couh nanzgvaq, gou vih Bouxcuengh miz Vahcuengh swhgeij gamjdaengz miznaj: Gou mbouj nyinhnaeuz cab Cuengh couh dwg huk, hix mbouj nyinhnaeuz cab Cuengh couh boihseiz, engq mbouj nyinhnaeuz cab Cuengh couh najdaemq vunz mbaek ndeu, aenvih Vahcuengh dwg vahcoj Bouxcuengh, coj raeuz hawj gyoengq lwglan lwgminz Bouxcuengh caeuq bouxwnq doxgangj doxgyau.

Vahcuengh, gou gyaez mwngz ndiep mwngz; cab Cuengh, gou mbouj caiq najmong, mbouj caiq doeknaiq.

（sat）