Lwg: Siujhanz rumzhuhu,

Gou hawj cuz sij saenq;

Cuz ndang ak cingsaenz,

Lwg cix maengq baenz maz.

Cuz: Lwglan aeu liengzsim,

Nyinh sij saenq ma caz;

Cuz nienzgeij goujhaj,

Baenaj rox maz yiengh.

Lwg: Seiq bi boh gou dai,

Baengh cuz daiq daengz hung;

Seizneix gou baenzvunz,

Mbouj lumz aencingz cuz.

Cuz: Boh mwngz sambet bae,

Meh samngeih guhmaiq;

Seng sou caet lwgsai,

Yaek rim daiz vunz ndeu.

Lwg: Cuz bineix goujhaj,

Gou hix ma caetbet;

Cieng geiq ngaenz haj bek(bak),

Simget hix di neix.

Cuz: Lan dajgoeng haj bei(bi),

Guh ndaej seiq caengz laeuz;

Ranz miz cienz miz haeux,

Ndi aeuheiq gijmaz.

Lwg: Najleix hab lai yaiz,

Daengz dai ndi yungh hauq;

Guh sam seiq haemh dauh,

Saiq gim bauj geijlai.

Cuz: Najleix gwn ndei di,

Dai gaej heiq guh dauh;

Rom cienz lan gauhgauj,

Cog lau dauq mizfuk.

Lwg: Lauxcuz gangj ndaej ndei,

Coenz neix dauhleix cingq;

Hoj mbouj ndaej saenq mingh,

Bingh mbouj ndaej saenq fangz.

Cuz: Ciuhvunz cingq seiq neix,

Seiq daihngeih nanz bungz;

Ndaej hoengq ma dajcunz,

Mbouj ndaej lumz diegcoj.

Lwg: Diegcoj ciengx gou hung,

Ma cunz dwg dauhleix;

Ranz miz nuengx miz beix,

Cieng neix baema cunz.

Cuz: Dangj goengdaek rim doengh,

Goengloh doeng daengz mbanj;

Beksingq bouxboux danq,

Riengz dangj miz vuenyungz.

Lwg: Dou hai ci baema,

Bwh miz bya miz haeux;

Haj daih vunz gingq laeuj,

Hoh cuz gyaeu bak bi.