□ Hoz Saubangj sij Cinz Siengzcouh Liuz Gingliuj Cinz Siengzgen hoiz

Bi 1965 ndwen 4 ngoenz 9, 《Yinzminz Yizbau》 ciuq gij saeh Yungzyen sawq ndaem go’nywj- vahoengz ndaej baenzgoeng caeuq Guengjsae gvangqlangh doihengz gofoed seizdoeng ndaem haenx fatbiuj le 3 bien faenzcieng. Bien ndeu dwg 《Buqcawz Maezsaenq, Aeueiq Gohyoz》, bingzlwnh gij sawqniemh diegcungqgyang Guengjsae caeuq diegnamz Guengjsae sawq ndaem go’nywjvahoengz ndaej baenzgoeng haenx, nyinhnaeuz “gijneix dwg gij cosih youqgaenj vunzlai bonjdieg daezsang nungzyez swnghcanj haenx, caemh dwg gienh saehlaux guek raeuz dieg baihnamz Vujlingj nungzyez fazcanj lizsij gwnzde ndaej daihlig senhconz ndeu.” Bien ndeu dwg 《Guengjsae Gvangqlangh Ndaem Go- nywjvahoengz Caeuq Gosauswj Ndaej Baenzgoeng》, bauqnaeuz Gvangjsih Yungzyen genhciz gohyoz sawqniemh, cungbuq gij “dieggimq” ndaem gofoed haenx, guh baenz boux buengjyiengh hawj guek raeuz baihnamz mbangj dieg ndaem gofoed, cauh baenz diuzgienh hawj nungzyez ndaej okonj oklai. Bien ndeu dwg 《Go’nywjvahoengz Baenzlawz Ndaej Gvaq Vujlingj》, gaisau le Yungzyen Yenveij youq sawq ndaem gofoed ginggvaq gij daidu、fuengfap、naemjfap haenx, gaisau le gij cingzgvang Gvangjsih fazcanj seizdoeng ndaem gofoed haenx, naeuz Gvangjsih gaxgonq miz “naz seizdoeng youq mbwq youq hoengq” daiqlai, seizneix gaenq ndaej “ndaem gofoed baenz cienfanh moux doxhwnj”, gij dieg gaxgonq deng dangq “dieggimq” haenx, “seizneix gaenq hai doh vahoengz”. Sam bien faenzcieng neix ciemq bae 3/4 bienfuk banj daih 3. 《Yinzminz Yizbau》 guh yienghneix yienhda bauqnaeuz Gvangjsih ndaem gofoed, saedcaih noix raen.

Gij cien lai fanh moux reih goofed neix, doiq Gvangjsih dauqfuk caeuq fazcanj haeuxgwn swnghcanj ok liux rengz hung.

(caengz sat)