Ndaw ngoenznaengz swnghhoz ciengz miz cungj cingzgingj neix: Mwh raeuz saetbaih seiz, maqmuengh miz vunzcaen daeuj nai; mwh raeuz guh ndaej baenzgoeng seiz, youh maqmuengh gyoengq doengzdoih ndaeuj hemq ndei, hoeng gou saetmuengh lo. Caeuq haujlai doengzsab doxlumj, gou hix miz cungj ginglig neix gvaq, baenzneix, gou menhmenh hag rox le vih swhgeij dopfwngz. Cingj yawj——

Vih bae camgya Yinghyij doxdax, gou goemz gyaeuj boih danhswz, guh dapdaez, cingzcik baez fat roengzdaeuj, gou lienz gij“ciengj vahnai” cungj mboujmiz. Doeknaiq gvaq le, gou gag nai swhgeij: Yienznaeuz mbouj ndaej ciengj, hoeng gou caenhrengz lo, gag gamjdaengz gou biujyienh mbouj loek, gou vih swhgeij dopfwngz!

Vih yiengq bohmeh byaujmingz gou gaenq majhung lo, ngoenzsinghgiz gou caegcaeg gag youq ndaw ranzdajcawj nyaengq baenz buenqngoenz, maqmuengh naengz cawj donq haeuxbyaek ndeigwn ndeu, hoeng dingq bohmeh naeuz donq haeuxbyaek gou cawj neix ceiq nanz ndwnj lo. Gou mienh gwn gij haeux swhgeij cawj buenq ndipcug neix, mienh lwnh hawj swhgeij: Dwk raemx noix di lo, mboujgvaq ngamq dwg baez daih’it cawj haeuxbyaek, guh daengz baenzneix gaenq mbouj loek lo, couh vih di neix, gou aeu vih swhgeij dopfwngz!

Youq gwnzdangz, mwh gou dap gij vwndiz lauxsae ndeindi, ndaejdaengz lauxsae haenh, yawj daengz lwgda gyoengq doengzhag haenh ndei caeuq hozhaenz seiz, gou engq vih swhgeij dopfwngz!

Mwh gou cingsim “dajcauh” cozvwnz deng lauxsae dangguh fanvwnz youq ndaw ban daeuj baijok seiz, gij vuenheij ndawsim couh lumj raemxlangh ityiengh fub hwnj fub roengz, gou engq nyaenx mbouj ndaej heiq vih swhgeij dopfwngz!

Baez doek baez ndaej baenzgoeng, baez doek baez saetbaih, baez doek baez vih swhgeij dopfwngz, baez doek baez vih swhgeij gyayouz. Gwnz diuzroen sengmaj bu rim le saetbaih caeuq haemzhoj, dangyienz dingzlai dwg guh ndaej baenzgoeng, gou aeu mboujduenh cungj- gez gij gingniemh saetbaih, caux ok engq lai gihvei guh ndaej baenzgoeng!

(seiq nienzgaep Du Yalungz)