Gangj daengz dou haj nienzgaep ngeih ban, gij saeh mizyinx caen lai. Neix lij aeu daj ban dou “sai”“mbwk” song daih “bangbaih” gangj hwnj……

Bangbaih “sai”miz sam daeg lwgsae, caen ndaej heuh guh “sam daih vunzcaiz”. Sam boux ndawde, boux he dwg Beiz Cilu, hwnjdangz cungj dwg raeujninz, couh lumj doenghduz haeuj doeng le ninzdoeng nei(gij vah lauxsae ), fazyenz seiz mbouj gyaez fazyenz, diemj de fazyenz le de gangj mbajmbadmbad, caen hawj vunz nyaenx mbouj ndaej riu. Lingh boux dwg Vangz Saugez, lienh ndaej ndang goengfou “cap bak” he, hwnjdangz seiz cungj dwg bak vaiq gvaq uk(gij vah lauxsae). Boux doeksat dwg Vangz Veijgangh, de caen dwg boux “saego” Vangz Saugez, gij goengfou “cap bak” de caen dwg lienh daengz ceiq vaiq lo, miz baez ndeu lauxsae naeuz fanghyangbanz yindung dwg baenqcienq, de dauq naeuz feihgih fanghyangbanz dwg bingz dwk doi; lauxsae naeuz song boux doxliz cien mij he gangj vah dingq mbouj nyi, de naeuz dwk dienhvah dingq ndaej nyi; lauxsae heuh dou sij fouqdoiq, daeg neix gangj vah mbouj hwk dai vunz mbouj sat, gingqyienz dawz coenz sei riuzmingz ciuhlaux bien baenz“Ciuhvunz haemzhoj byawz mbouj dai, dai caeux dai ceiz cungj dwg dai”…… Byawz gamj venj cungj doiq neix?! Lauxsae raen yienghneix cijndei mbouj ok sing……

Doiq gyoengq doengzhag sai baklai, doiqbeij daeuj yawj, gyoengq doengzhag mbwk engq cigciep di___Moix baez yawj mbouj gvaq da, hwnjbae couh din dik mbat he! Bang doengzhag “mbwk” miz “seiq daih dah gyaeu”: Neix mbouj dwg gangj Sih Sih、 Diuh Canz seiq dah gyaeu ciuhlaux, dwg gangj Vangz Swjcingh Vangz Swjmingz song cejnuengx, Cwnz Yingjgez caeuq Vangz Hauyij. Song cejnuengx haenx boux ndeu deng vunz hangz, couh heuh lingh boux itheij, song vunz doengzcaez hwnjbae gienz dub ga dik, boux hwk de haenx couh ca mbouj geijlai lo. Cwnz Yingjgez yienznaeuz ngamq daeuj ban dou, yawj hwnjdaeuj haemq dinghsienh, hoeng ga de gaeuq rengz, dik deng ndok ha, hawj mwngz inget buenq ngoenz. Vangz Hauyij youq “seiq daih dah gyaeu” ndawde suenq dwg bouxdaeuz lo, lij dwg dijyuz veijyenz, de ak cingj vunz, banhfap gaeuq haenq ne! Byawz nyex hawj de mboujmiz banhfap le, de couh daej, daej hemq hwnj mbwn hwnj fwj bae, seizhaenx de couh lumjbaenz duzcwz duet ek he! Couh suenq dwg lauxsae hix lanz mbouj ndaej! Ndigah, “seiq daih dah gyaeu” neix gizsaed dwg “seiq daih dah yak”!

Hoeng gyoengqde hix miz haujlai youhdenj, cizdij hozdung seiz hix doxgiet doxbang. Aenvih miz gyoengqde, gij hagdangz swnghhoz raeuz cij lai yiengh lai saek! Aenvih miz le “sai” “mbwk” song daih “bangbaih”, gij swnghhoz dou cij engqgya cingcaij!

(haj nienzgaep Yi Bozvwnz)