Seizcin daeuj daengz lo, gak cungj vadoengh hix haihoengh lo, mbangj henjrwg, mbangj ndingfwg, mbangj lamzyau……Faexhung did ngazoiq, lienz duz saehaexma ninzdoeng hix ndiusingj lo. Bya iq youq ndaw mieng con bae con dauq, daihdeih cungmuenx senggei.

Saehaexma ietnonx aen ndang, doeng yawj sae ngonz, lumjbaenz cingq ra gijmaz nei. Sawqmwh, de raen go makit ndeu, doq myaiz rwi myaiz raengh lo, hoeng aenvih gomakit sang lai, de cijnaengz youq lajgoek muengh ndwi. Hoeng, de youh lingzsingj gvaqdaeuj, gag gangj gag nam naeuz:“Gou ndaej raih hwnjbae ya, yienznaeuz raih menh di, hoeng mwh gou raih daengz gwnz seiz, makit gaenq nding lo.”Gangj guh couh guh, saehaexma hainduj raih hwnjbae lo. Duz roegfaenbyaek gwnz faex doiq doengzdoih naeuz:“Yawj, gizhaenx miz duz saehaexma huk ndeu, seizneix makit lij caengz cug, de couh hainduj raih hwnjbae, ndeiriu lai lo!” Saehaexma cang guh rwznuk dingq mbouj nyi, ciuqyiengh mbouj dingz mbouj duenh raih hwnjbae.

Daengz seizhah lo, ndithaenq ciuq dwk daihdeih ok hoenz. Yienznaeuz ndataeng, hoeng saehaexma ciuqyiengh raih mbouj dingz, daengngoenz cungj yaek dak de sauj lo, hoeng de lij genhciz dwk raih. Ngoenz ndeu, saehaexma baez yamq baez yamq raih hwnjbae, fat rumzhung lo, byajraez maenj- humhum, ciepdaeuj doek fwnhung lo. Saehaexma mbouj siujsim deng laemx youq gwnz mbaw makit ndeu.

Roegfaenbyaek youh daeuj lo, riusoemj dwk doiq saehaexma naeuz:“Mwngz couh gaej caiq raih lo, saehaexma huk.” Saehaexma naeuz:“Gaenq raih daengz baenz sang lo, gou dingz roengzdaeuj couh beg sai doegrengz lo.” Roeg- faenbyaek nyaekheiq dwk mbin deuz lo.

Couh baenzneix, mbouj rox laemx gvaq geijlai baez, saehaexma soqlaiz mbouj ndekndwi gvaq. Daengzlaeng, de raih daengz gwnzdingj gaq makit lo, makit hix cingqngamj nding baenz gwn lo, mwh de gwn gij makit diemzsub haenx seiz, ndawsim hix dwg diemz dangqmaz.

(sam nienzgaep Cau Vanjhungz)