□ Hoz Saubangj sij Cinz Siengzcouh Liuz Gingliuj Cinz Siengzgen hoiz

Yungzyen mbouj hawj bouxlingj- dauj swcigih saetmuengh, gyoengqde ndaem gofoed ngoenz ndei gvaq ngoenz, ngoenz lai gvaq ngoenz. Bi 1963 seizdoeng ndaem 1.1 fanh lai moux, ndawde naz ce ceh go’nywj- vahoengz 8800 lai moux. Bingzyaenz moux ok ceh 42.5 gaen, gaijbienq le Guengjsae baengh swngjrog gunghawj ceh dingz cingzgvang neix. Bi 1964 seizdoeng ndaem baenz 16 fanh moux, bi 1965 seizdoeng dabdaengz 22 fanh lai moux, ciemq dieggvangq nazhaeux 80%. Seizdoeng naz ndaem gofoed ngoenz gvangq gvaq ngoenz le, gij canjliengh haeux caemh ndaej daihfuk hwnjswng. Caengz ndaem gofoed gaxgonq, Yungzyen ndaem haeux ciengzgeiz dwg moux ok 500 lai gaen hwnjroengz, bi 1966 ndaej gyawj 1000 gaen, bi 1967 baenz le Guengjsae aen yienh daih’it moux ok mauhgvaq cien gaen ndeu.

Aenvih lingjdauj yawjnaek, caengzcaengz sifan, yungh diemj daeuj daiq mienh, daengx gih gofoed fazcanj ndaej gig vaiq. Bi 1964, seizdoeng ndaem gofoed ndaej 400 lai fanh moux, bi 1955 demgya daengz 800 lai fanh moux, caemhcaiq baujciz le siengdoiq onjdingh. Gyahwnj gij doenghgogai wnq, sojmiz gij dieg- gvangq seizdoeng ndaem haenx dabdaengz 1100 fanh moux baedauq.

Yungzyen youq gaiq “dieggimq” sawq ndaem go’nywjvahoengz baenz- goeng caemhcaiq youq daengx gih vaiqriengj fazcanj gij doenghgogai seizdoeng, ndaej daengz gak fueng- mienh yawjcim. Bi 1964, swngj Guengjdoeng ciuq gij cijsi Dauz Cau, cujciz le gij mizgven vunzgaemhong nungzyez swngj、digih、si、yienh haenx bae daengz Yungzyen ngonzyawj, caemhcaiq daj Yungzyen bincingj le 200 lai boux gisuzyenz bae Guengj- doeng sonyinx ndaem gofoed.

Bi 1965, Guekgya Nungzyezbu iu gij boux lingjdauj mizgven bumwnz Anhveih、Huzbwz、Guengjdoeng、Fuzgen、Yinznanz、Gveicouh daengj swngj haenx, daeuj Yungzyen camgya aen Hoih Hong Ndaem Bwnhfoed Guengjsae, doxvuenh doxson gij gingniemh ndaem gofoed. Cunghyangh Sinhvwnz Denyingj Ciben Cangj daegdaengq ingj liux gijluzben youq daengx guek senhconz.

(caengz sat)