Geiq ndaej cejdaih gou siujyoz bizyez le, couh bae youwzyenz ndaw mbanj dou son saw, dang boux lauxsae lwgnyez ndeu. Gou minghndei ndaej bae youwzyenz doeg bi saw ndeu, doeklaeng couh hwnj siujyoz doeg saw lo.

Youq siujyoz haj bi seizgan ndawde, gou mbouj dingq lauxsae gou gangj saek coenz vah bujdunghva vahgun gvaq. Seizhaenx, ndaw mbanj dou cijmiz ranz cunhcangj miz aen densigih saekndaemhau ndeu, moix ngoenz banfuemx cuengqhag seiz, gou itdingh guh ndei gij hongranz sat le, cij ndaej caeuq gyoengq doengzdoih itheij lumj mbin nei buet bae ranz cunhcangj liz mbanj gou miz cib leix loh gyae haenx yawj densi. Ngamq bae yawj lij baenz, hoeng, bae lai le couh mbouj baenz lo. Aenvih yawj densi vunz daiq lai, mbouj miz dieg ndwn, daeglwgdaih cunhcangj couh hainduj sou ngaenz, de yienghneix guh daeuj doiq gyoengq lwgnyez dou, de rox gyoengq lwgnyez dou mbouj miz ngaenz. Aenvih ndaw daeh mbouj miz ngaeuz, gou cijndaej ndwn youq baihrog ranz “yawj” densi lo, vah cix naeuz “yawj”, hoeng cungj yawj mbouj raen gijmaz, cij ndaej dingqdingq sing densi. Seizhaenx, gou youq baihrog menhmenh geiq ndaej haujlai vah bujdunghva Vahgun.

Seizhaenx, lauxsae yijvwnz gou dwg boux siujyoz seiq nienzgaep “bizyez” ndeu, mbouj yungh ngeix couh rox, vah bujdunghva Vahgun de baenzlawz lo. Couh yienghneix, daengz gou haeuj hagdangz guh lauxsae le, vah bujdunghva Vahgun gou hix lumj vah lauxsae gou. Miz haujlai hagseng doiq gou miz yigen, naeuz gou hwnjdangz gangj vah bujdunghva Vahgun cab Cuengh lai, dingq mbouj rox, gou couh doiq gyoengqde naeuz, gij genyij sou gou louz roengzdaeuj, hoeng gou cij rox fat hing yienghneix lo. Hagseng gangj lai, yozyau lingjdauj gietdingh hawj gou bae hag Vah bujdunghva moq.

Mwh youq siujyoz guh hong seiz, gou baez daih’it gauj vah bujdunghva Vahgun ndaej 66.7 faen, gvaq geij bi daeuj daengz cunghyoz, gou caiq bae gauj mbat ndeu, baezneix beij baez daih’it ndei, ndaej 73.7 faen, gyoengq lauxsae naenz, baenz ha, caiq roengzrengz gauj baez dem, bimoq couh doenggvaq lo. Gou naj nyaeuq naeuz, cib bi ndaej 7 faen, caiq gvaq song aen cib bi, gou hix doiq roengzdaeuj lo. Gou nanzgvaq lai lo, swhgeij mbouj youqgaenj, doiq lwghag daeuj gangj, gou mbouj miz naj son gyoengqde ha! Gangj vah cab Vahcuengh cab Vahgveiliuj, yiengh lauxsae neix, baenzlawz bae son hagseng ha! Nguh lwg vunz bw.

Cab Cuengh, dwg gij saenqhauh vah daegbied Bouxcuengh raeuz, hawj bonjfaenh daiq daeuj haujlai simnyap, bouxwnq aeu daeuj guhcaemz guhriu. Vah bujdunghva Vahgun singmeh “g、k” mbouj rox, “j、q” mbouj faen, “d、t” mbouj doeng, “z、c、s” mbouj rox dwg bingz mbouj bingz, “zh、ch、sh、r” mbouj rox baenzlawz yiengh. Youq gyoengq beixnuengx doengzsaeh doxbang baihlaj, gou couh cuengq damj bae lienh doeg, hoeng, vanzlij mbouj baenz, sam coenz vah couh liz mbouj ndaej Vahcuengh, seiq gawq mbouj cab Cuengh couh mbouj cwxcaih, gou mbouj dwg daegdaengq caeuq vah bujdunghva Vahgun guhyak, cij dwg ndwenngoenz mbouj leix vunz lo, aenlinx caen dwg heux mbouj gvaqdaeuj, fouzfap caeuq gyoengq beixnuengx Bouxgun beij lo.

（caengz sat）