3 ndwen gaxgonq, ranznden soengq duz ma iq lij caengz ndaej ndwen haenx hawj gou. Duzde ndang luenzlili, gij bwn saek hau, lumh gij bwn gig sangj, fouq lwgda ndaemndatndat, dwggyaez dangqmaz, dou heuh de guh Dahhau.

Gaej yawj dahhau yienghneix iq, de lumj daxmeh de, hix ak raixcaix, cijaeu miz vunz byaij gvaq bakdou ranz gou, de couh boemz roengzdaeuj, sing hung dwk swenj hwnjdaeuj. Yienghneix, daxboh aeu lienh daeuj lamh de hwnjdaeuj, mboujnex, de couh daj gehdou ndonj okbae, bae hwk boux byaij gvaqdaeuj haenx. Ngamq daeuj ranz gou duenh haenx, de rox buet baema aen ranz gaxgonq de, baeznaengz dou ra mbouj raen de seiz, de cingq youq ranz gaxgonq de caeuq daxmeh、 beixnuengx de guh’angq ne. Mboujguenj baenzlawz swenj heuh de, de cungj mbouj ma, cungj dwg ranznden umj de dauqma hawj dou. Baeznaengz dahhau raen dou gaem gij gwn seiz, de couh diuqyetyet dwk, gwn doxgaiq seiz, cungj gaemz hung dwk, lumj geij ngoenz mbouj ndaej gwn doxgaiq lo, lij mienh gwn mienh bi rieng, lumj docih dou soengq doxgaiq hawj de gwn. Baeznaengz daengngoenz hwnj sang seiz, de couh gikgyakgyak dwk ninz youq gwnz dieg; baeznaengz mbwn laep seiz, dahhau couh bi diuz rieng, lij swenj dwk, siengj hawj dou daiq de okbae youzbyaij, deng gyaeng ngoenz ndeu le, de gamjdaengz mbwq raixcaix, hix siengj okbae guhcaemz lo.

Neix couh dwg duzma iq dwggyaez youh cabheiq ranz gou. O, de yienznaeuz miz di cabheiq, hoeng ngoenznaengz hix lauxsaed gamguenj aen ranz. Siengsaenq sou raen dahhau le, hix gyaez de ha.

（指导老师：李文海）