Moix haemh mbwnfuemx, gizgyae cienz daeuj gij yinhyoz ndeidingq, daxmeh ndeigyaez gou haengjdingh youh youq gij yinhyoz ndeidingq haenx diuqfoux yekyek lo.

Gou fatyienh daxmeh bienq lo. Gaxgonq gwnz gai miz vunz diuqfoux, gou cungj buet bae ngonz, lij riengz hag diuq dem, moixdang gou diuq dwk mizyinx seiz, daxmeh couh rag gou baema ranz, lij hongz gou naeuz: “Seizneix hagsib youqgaenj, gaej bae hag fij mboujmiz yungh neix.”Gou mbwq gij dauhleix hung daxmeh, couh nyaenx dwk mbouj bae lo, hoeng youh nyaenx mbouj ndaej cam daxmeh: “Daxmeh, mwngz vih gijmaz mbouj bae diuqfoux ha! Youh ndaej cangqndang youh ndaej gemjbiz……”Daxmeh gag damz naeuz: “Gou hag mbouj rox law.”Gou yawj fouq da daxmeh, yawj ndaej ok de miz di simdoengh lo, ndigah couh lex gij daih dauhleix de ciengz gangj haenx naeuz: “Gizlawz miz maz doxgaiq hag mbouj rox, mbouj hag baenzlawz rox ne.”Daxmeh yawj gou, lumj dahsau iq dawz mbouj dingh cawjeiq he, gou youh caiq gujli de, de lumj roengz gietsim lo, seizneix gou sikhaek rag de bae dieg diuqfoux haenx.

Daj seizhaenx hwnj, daxmeh couh maez diuqfoux lo, cengdi baez daengz banhaemh roek diemj buenq couh bae dieg haenx diuqfoux lo, cig daengz bet diemj cij dauqma. Moix baez dauqma, daxmeh youh lwnh gij saeh sim’angq de hawj gou dingq. Gou gag angq, siengj mbouj daengz gou hix ndaej gaijbienq daxmeh!

Cuengq sujgyaj baema lajmbanj, gou laihnaeuz daxmeh yaek camhseiz biek gij foux de lo, byawz rox de lij dwg sibgvenq dwk baez gwn caeuz sat couh okbae, laxlawz de gingqyienz bouxdog youq gwnz benq namh hoengq aen ranzmiuh ndaw mbanj gag diuq, caen dwg myik daengz gou lo.

Mbouj geij nanz, ndaw mbanj haujlai vunz daeuj humx daxmeh, lienz vunz mbanj wnq hix ganj daeuj lo, doeklaeng baenzlawz yiengh gaenq mbouj yungh gangj lo, daxmeh ndaengmoj dwk baenz boux vujdau lauxsae ndaw mbanj, miz aen doih diuqfoux he, daxmeh baenz gwnz vujdaiz dujva ceiq ronghsien haenx.

Daj daxmeh maez diuqfoux le, saedceij gou couh bienq camj lo, daxmeh cengdi moix ngoenz cungj daeuj geuj gou, heuh gou bang de hwnj muengx yacaij gohgiz, gou cijnaengz bang de, guhdaengz gou seizneix baez dingq daengz “go” cih saw neix couh yaek gyaeuj dek.

Mboujgvaq moix baez yawjraen daxmeh diuqfoux gij yiengh angqfwgfwg haenx, gou gamjdaengz gou sinhoj di hix daej lo. Daxmeh gaenq geq lo, miz byomhau daj ndaw byomndaem conh okdaeuj lo, daegbied yienh da, gou gamjdaengz daengz cungj nienzgeij neix ra ndaej gienh saeh cihgeij gyaez guh he, couh dwg cungj vuenyungz he, cungj yiengjsouh he.

Daxmeh, gou hohfuk mwngz, hoh mwngz ciengxlwenx fouxdoengh vaiqlag. (roek nienzngaep Cau Vwnz)